Aalisartuuneq piniartuunerlu navianartorsiortinneqarput
Aqerloq pinngortitamut peqqinnanngilaq, kisiannili aqerlussaq piniartunik atorneqartoq pinngortitamut navianartorsiortitsinngilaq, inuiaqatigiinnimmi aamma aqerlumik atuinermit saliinissamut aningaasaliisoqarneq ajorpoq, Northern Equippingimmi piginnittoq taama oqariartuuteqarpoq.
- Maanna tunngavilersuutigineqartoq orpippassuarnik aallaveqarpoq. Aqerlussarmi Kalaallit Nunaata pinngortitaanut uloriannanngilluinnarpoq. Danamarkimimi timmissat tatsini aallaaneqartarput, tassanilu aqerlussat ulorianarsinnaapput, tatsimmi naqanut kivigunik timmissanik nerineqarsinnaapput. Tamannali Kalaallit Nunaanni allalluinnarpoq, timmissammi immami piniarneqartarput, tamaanilu Danmarkimitulli ajornartorsiutaanngilluinnarpoq. Tamatumalu saniatigut aqerlussat amerlasuullit atorneqarunnaassappata anginerusunik atuisoqalissaaq, piniatullu timmissanik pisaqarniassagunik piniagartik qanillingaatsiaqqaarlugu pisarisinnaassavaat. Uangalu isumaga malillugu assigiinnassavaa piniakkat mikisut qamutilinnik piniarneqartutut ilissasut, Jørgen B. Jensen taama isummersorpoq. Aqerlussanik pisinniarfiutimini nioqquteqarnerminut tunngatillugu taama isummersunngilaq, aqerlussammi piniutissanik allanik taarserneqaraluarpata iluanaarutinut allanngortitsingaarnavianngitsut Jørgen B. Jensen isumaqarpoq.
Inuiaqatigiit akornanni ajornartorsiuterpassuaqarpoq, taakkulu ilaat Naalakkersuisut isiginiarnerusinnaagaluaraat Jørgen B. Jensen isumaqarpoq. Imigassarmi tupalu sanilliutissagaanni ajornartorsiutaanerusut taanna isumaqarpoq.
-Inuit imigassamik atuinerujussuat ajornartorsiutigaarput, Kalaallillu amerlasoorujussuit pujortartarput. Tamatuma malitsigisartagai millioninik taamannanik akeqartarput, isumaqarpungalu inuiaqatigiit peqqinnerusumik inuuneqarnissaat isiginiarneruneqartariaqaraluarpoq. Naammagittarlutik inuuniuteqartut artukkernagit inuiaqatigiinni ajornartorsiutit annerit iluarsiniarlugit politikkerit suliniarlik, Jørgen B. Jensen ulluinnarni qanimut piniartunik aalisartunillu attaveqarluartoq taama naggasiivoq.
Naalakkeruisoq Anthon Frederiksen maanna angalammat oqaaseqartissinnaanngikkallarparput, Jørgen B. Jensinimullu akissutissaa aqagu knr.gl-mi saqqummiunneqarumaarpoq.
