Aalisartut umiarsualivinnik assersuinissaq siorasaarutigaat

Aalisartut piniartullu kattufffiat KNAPK ataqatigiissaarinialerpoq nuna tamakkerlugu akerliussutsimik takutitsinissamik taannalu Inatsisartut ukiaanerani katersorneranni pissaaq. Immikkoortoqarfiit ilaasa kaammattuutigaat umiarsualivinnik assersuisoqassasoq.

- KNAPK-mi siulersuisuunerniit nalunaarutigaarput tamanna inatsisinik unioqqutitsinerussasoq. Taamaattumik umiarsualivinnik assersuinissaq tapersersorsinnaanngilarput. Taama pisoqassappat aalisartut ataasiakkaat tamanna akisussaaffigisariaqassavaat, Leif Fontaine taama KNRimut oqarpoq.

Ilanngulluguli oqaatigaa aalisartut ilungersornerat paasisinnaalluarlugu tamannami tunngaviummat akerliussutsimik takutitsisoqarnissaanut.

- Asersuutigalugu aalisartut Uummannarmiut angalateeqqaminnik Upernaviup eqqaanut aalisariarsimapput inuunertik akigeriaannaallugu, Leif Fontaine nassuiaavoq.

- Qaammatinut sisamanut pisassiissutit Uummannami nungunneqareerput aalisartullu kissaatigisimagaluarpaat silap unerisimanerani aalisarnerup ingerlannissaa, Leif Fontaine oqarpoq.

Uummannap eqqaani aalisartut kissaatigisimagaluarpaat qaammatinut sisamanut pisassiissutaasut qaffanneqarnissaat kinguneqanngitsumilli.

- Kisianni aamma aalisartut allat sineriammiittut pissutsit naammagiinnarsinnaajunnaarlugit akerliussutsimik takutitsiniarput, Leif Fontaine oqarpoq.

Akerliussutsimik takutitsinissaq suli ullulerneqanngilaq taamaattorli oqarasuaat kipissanani KNAPKp Nuummi allaffeqarfiani sianertuarpoq akerliussutsimik takutitsinissaq pillugu.

- Inatsisartuni oqaluuserisassat tunngavigalugit qaqugu pinissaa aalajangerneqassajunnarsivoq, Leif Fontaine oqarasuaatikkut allamik oqaloqateqanngilaarnermini oqarpoq.

Aalisarnermut inatsit qaqugu Inatsisartut oqaluuserissaneraat suli aalajangerneqanngilaq.