Aalisartut umiarsualivinnik assersuiniarlutik sioorasaaripput
KNAPK-p akinik minnerpaaffiliisoqarnissaanik oqariartuutaa tapersersorniarlugu Nuummi aalisartut iliuuseqarnialersaarput. Umiarsualiviit tallimanngornermi juulip ulluisa pingajuanniit assersulerniarlugit aalisartut sioorasaaripput.
juunip 23-at 2009 14:44
Aalisarnermut piniarnermullu naalakkersuisumut Ane Hansenimut taama toqqusassiipput.
- Akit minnerpaaffilerniarlugit isumaqatigiinniaqqusivugut isumaqatigiissuteqartussallu tassaapput Namminersorlutik Oqartussat aamma KNAPK. Isumaqatigiinniarnerit aallartereersimassapput juunip 29-ani naammassereesimassallutillu juulip pingajuanni nalunaaqutaq ullup-qeqqanut, Nuummi Aalisartut Piniartullu Peqatigiiffiani oqaaseqartuusoq Johannes Heilmann oqarpoq.
- Suliassaq unammilernartutut takusinnaavara, qularutiginngilara suliassat takkussuutut ataatsimiititaliap aamma itisilerlugit suliariumaarai, taama oqarpoq Inatsisartut aalisarnermut ataatsimiititaliaata siulittaasua, Andreas Uldum.
