Aalisartut tunisisarnerminni akiliinerusalissapput
Kalaallit Nunaanni Aalisartut Piniartullu kattuffiat KNAPK ataatsimeersuarnermini aalajangiuppaa aalisartut tunisisarnerminni procenteerutaat qaffalaassasut, agguaqatigiissillugu 0,25 %-mik.
Taamasilluni aalisariutit 8 milliuuni koruunit ataallugit isertitallit 1½ %-mik, katuffimmut akiliisalissapput.
Aalisariutit 8 milliuunit koruunit qaangerlugit 0,85 %-mik akiliisalissapput.
Aalisariutaatillillu 8 milliuuni koruunit missaannik isertitaqartut kattuffik isumaqatiginiarfigalugu %-teerutit aalajangersarneqartassapput.
Kattuffiup procenteerutini isertitai 25 %-tit sinerissami immikoortortaqarfinnut utertassasut aamma ataatsimeersuartut aalajangiuppaat.
KNAPK-p siorna aningaasat 7,4 milliuuni koruunit kaaviaartippai, taakkunannga %-terutinit 4,7 milliuuningajaat isertinneqarsimapput.
Aalisartunut piniartunullu siunnersuisarnermut atatillugu Namminersornerullutik oqartussanik isumaqatigiissuteqarnermi KNAPK-p 2,6 milliuuni koruuninik pissarsissutigisarpaa.