Aalisartut qulingiluat Pinngortitaleriffiup kilisaataanit Pâmiunit annaanneqartut
Imarsiortut umiarsuaataata raajarniut immakkiartormat imarsiortut umiarsuarmit qimaguttariaqarsimapput. Nittartagaq Digitaljournal.com taama allaaserisaqarpoq.
Umiarsuaaraq Iqaluit avataata kujatinnguani qeqertap Resolution Islandip eqqaani ippassaq ualikkut silarlunnerani umiusimavoq.
Umiartortut annanniummi akunnialunni tissukareerlutik kalaallit umiarsuaannit Pâmiunit takuneqarsimapput, kingornalu annaanneqarlutik.
Imarsiortut annanniummiitillutik Canadamiut sinerissamik nakkutilliisuannut attaveqarsinnaasimapput, taamaalereermallu kalaallit umiarsuaannit orninneqannginnerminni nerisassanik imeruarsaatinillu timmisartumit Herculesimit nakkartitsivigineqarsinnaasimapput.
Umiarsuaaqqami inuttat kalerriinerminni oqaatigigaluarpaat raajarniut kivisimasoq, piginnittuatali kingorna oqaatigaa raajarniut annertunngikkaluamik ajoqusersimasoq.
Kilisaat Pâmiut Pinngortitaleriffimmit pigineqarpoq, Canadallu imartaani aalisarnermik misissuiartorluni.