Aalisartut piumasaat suli oqartussat akinngilaat
- KNAPK-p siulittaasuata sulinera malunnanngilaq, taama tunngavilersuipput Nuummi aalisartut piniartullu KNAPKp immikkut ittumik ataatsimeersuarnissaanik piumasaqarnerminni.
- Inuttarsiuinerit pillugit oqaaseqarnianngilanga, KNAPK-p siulittaasua, Leif Fontaine radioaviisimut oqarpoq.
Nuummi aalisartut piniartullu sisamanngornermi unnukkut radioaviisimut oqarput immikkut ittumik ataatsimeersuartoqartariaqartoq, KNAPK-p aalisartunik piniartunillu sullissinerat malugisinnaannginnamikku.
Tamatumunnga KNAPK-p siulittaasua Leif Fontaine ima oqarpoq:
- Siulittaasoq Leif Fontaine KNAPK-junngilaq. KNAPK siulersuisunit akisussaaffigineqarpoq, taamaattumik siulittaasumik pisuutitsiniarneq akuersaaruminaappoq. Maleruagassat malillugit sulivugut. Kattuffiup maleruagassai ersaripput, taamaammat siulittaasoq avammut oqaaseqartartuuvoq, imaanngitsoq kisermaassilluni sulisuusoq, siulersuisuunerit ataatsimoorluta sulivugut, Leif Fontaine oqarpoq.
Saarulliit akiisa minnerpaaffeqalernissaat anguniarlugu, sinerissami aalisartut oktobarip ulluisa aqqaneq aappaani akerliussutsimik takutitsipput.
KNAPK-p siulittaasuata, Leif Fontainep ullumi nassuiaatigaa, Aalisarnermut Piniarnermullu Naalakersuisumut oktobarip 22-anni allakkatigut apuussilluni, tassalu saarulliit akiinut minnerpaaffiliinissamut piumasaqaammik. Tassalu tamannarpiaavoq Nuummi aalisartut piniartullu qanoq iliuuseqartoqannginneranik uparuaanerannut ippassaq tunngaviusoq.
Tusagassiutinut nassiussamini Leif Fontaine allappoq. KNAPK-p siunnersuutigigaa 37,5 millioni koruuniit nalinginut 2010-mi sarulliit akiinut minnerpaaffiliisoqassasoq.
Taannarpiaavorlu aalisartut utaqqikatagaat.
Tassalu Aalisarnermut Naalakkersuisumik suleqateqarneq aammalu siuariartuutaanngitsumik oqaloqateqartarneq aalisartunit sorsuarineqalersoq.
- Siulersuisuunernut inuttarsiuinerit pillugit oqaaseqarnianngilanga, tamakku siulersuisuunernik susassaqarfigineqarmata, Aalisartut Piniartullu Kattuffianni siulittaasoq, Leif Fontaine oqarpoq.
Sinerissami illoqarfinni immikkoortortaqarfinnut paasiniaanitsinni paasinarpoq, immikkoortortaqarfiit amerlanerit immikkut ataatsimmersuarnissaq kissaatigigaat. Qasiginnguani KNAPK-p immikkoortortaqarfiani siulitaasoq, Jens Sandgreen oqarpoq, immikkut ataatsimeersuarnissaq akerleralugu, oqarluni ullormiit ullormut aaqqiisoqarsinnaagimmat taamaaliornissaq ajornartoq.
