Aalisartut pisatik qamuteralaat atorlugit assartorsinnaanngorpaat
Aalisartut pisatik qamuteralaat atorlugit assartorsinnaanngorpaat
Aalisartut Ilulissat kangiani qimusserlutik aalisartut pisatik Royal Greenlandip Ilulissani tunisassiorfianut assartuisitsisinnaanermut akuersissummik maanna tunineqarput, qamuteralaat atorlugit sikuup sinaaniit tunisassiorfimmut assartuisitsisinnaanermut akuersissummik tunineqarlutik. Royal Greenlandip nittartagaani tamanna atuarneqarsinnaavoq.
- Aalisartut pisaannik sikup sinaanit qamuteralammik assartuineq aalisartut sivisunerusumik aalisarfimmiissinnaanerannik periarfissiivoq. Sapaatip-akunnera tikillugu illuaqqani unnuisinnaapput, taamaasillutillu pisat annertunerujussuit pisarisinnaanngorlugit, tamannalu aamma ukioq naallugu Royal Greenlandip tunisassiorfiani suliassaqartitsinermik pilersitsivoq, Royal Greenlandimi aalisarnermut siunnersorti Therkel Mathiassen oqarpoq.
Ilulissanilu aalisartut assingusumik siorna aamma periarfissinneqarput:
- Siorna aaqqissuussineq iluatsilluarpoq, aalisartut 20-t 30-llu akornanni amerlassuseqartut sikumi aalisarnermi qalerallit 100 tonsit missingi tulaappaat. Qimussimik aalisarfimmiit Ilulissanut uteqattaarlutik pisaminnik tunisisarnerminni 30 tonsit missingi tunisaramikkit pisanik qamuteralannik assartuisarneq annertunerujussuarmik isertitaqassutigisinnaavaat, Therkel Mathiassen oqarpoq, nangillunilu:
- Siorna pisanik qamuteralannik assartuisinnaanermut akuersissut aatsaat februaarip naajartornerani tunniunneqarpoq, akuersissummilli tunisineq kingusinaarunneqarsimammat ukioq siusinnerusukkut piareersimavugut, taamaattumillu maanna tassa aalisartut sikumi pisaannik qamuteralannik assartuineq aallarteriaannaavoq, Therkel Mathiassen oqarpoq.
Aalisartut taamatut assartuisinnaanermut akuersissumik tunineqarsinaanissaat Qaasuitsup Kommunia aqqutigalugu Namminersorlutik Oqartussanit akuersissutigineqarpoq, qamuteralaalli nunakkut aalajangersimasukkut tamaallaat ingerlaarfeqarsinnaatitaapput, nuna UNESCO-p allatugaanittup taamaallaat aqqutigineqarsinnaanissaanut akuersissummik tunniussisoqarluni.
