Aalisartut pisatik namminneq uniartarpaat

Ilulissani aalisartut piniartullu peqatigiiffianni ilaasortat, Sermermiuniit illoqarfimmi tunitsivinnut, qaleralinnik immikkut ittumik assartuisarnissaminnut Qaasuitsup kommunianut aamma Nunami namminermut, Pinngortitamut Avatangiisinullu Naalakkersuisoqarfimmut qinnuteqaateqarput. Aalisartullu qaleralittaminnik pisarioqisumik assartuiniartaramik akissutissamik utaqqikatapput.
Allattoq Oline I. Olsen
apriilip 10-at 2012 10:10

- Ajornartorsiut imaannaanngilaq, sukkanerusumik suliaq ingerlattariaqarpaat, Ilulissani aalisartut piniartullu peqatigiiffianni siulittaasoq Anthon Lindenhann oqarpoq.

Tassa Ilulissat kangerluanni qaleraleralinniat Ilulissat umiarsualivianut siku pissutigalugu tikissinnaasanngillat. Maanna Sermermiunut, eqqissisimatitaasumut UNESCO-llu nunarsuarmi kingornussat eriagisassatut allattorsimaffianut ilaasumut, talittarput. Tassanngaanniit aalisartut pisatik ilaatigut 1.500 kilop tungaanut oqimaatsigisinnaasut qamutinik illoqarfiup tungaanut assartorniartarpaat.

Taamatut pisanik assartuisarneq qaammat sinnerlugu ingerlareerpoq, pisariummallu immikkut ittumik assartuisarsinnaanermut akuersisoqarnissaa aalisartunit kissaatigineqaraluarpoq.

Aalisartut immikkut akuersissummik pigisaqanngikkunik qamuteralannilluunniit qaleralinnik assartueqqusaanngillat, tassami Sermermiut qamuteralannik angallavigineqaqqusaanngillat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq