Aalisartut piniartullu utoqqalisut soraarnerussutisiaqalernissaq isumalluarput

Utoqqalinersiutit maanna atuuttut naammangitsut, apersukkavut isumaqarput.

- Pingaartumik kinguaaqqortuujulluni ernguttallu amerlagaangata utoqqalinersiutit naammangitsorujussuusarput. Aamma inissaqarniarnerup tunngaatigut angummatinnginnamik, 75-inik ukiulik inuunermi annersaani aalisartuusimasoq piniartuusimasorlu Nuummi najugalik Efraim Hansen oqarpoq.

Utoqqalinersiutit kisimiittumut qaammammut 10.000 koruuningajalluinnaapput. Tassa akileraarut suli peernagu. Taakkunannga ulluinnarni inuunniarnermi aningaasartuutit, soorlu ineqarneq, innaallagiaq, kiassarneq allallu akilerneqartarput.

Utoqqalinersiutillip taassumaluunniit aappaata allanik sulinermigut isertitaqaleriartorneratigut pensionit ikiliartortarput, 56.000 koruuninik isertitaqarsimaguni qummullu ilanngaatitinnerit aallartittarlutik.

Ukiumut 228.000 koruuninik allamit isertitaqarsimagunik utoqqalinermi pensionisiat atorunnaartarput.

- Soraarnerussutisiaqarnissaq uanga tapersersoqaara. Utoqqalilluni aalassarikkunnaarluni pinngitsoorneqarsinnaanngillat, Efraim Hansen nangippoq.

Iluliarmiu 64-inik ukiulik Hans Petersen ukiut 50-it pallillugit aalisartutut piniartutullu inuussutissarsiorsimavoq.

- Sinerissatsinni aalisartoqaterpassuakka seeqquluttorpassuupput, anniartuuaannartut suliaritinnissaminnullu utaqqiinnartut. Tassalu angalaanngikkunik oorisisinnaanatik. Aamma uanga tamaattuuvunga, Hans Petersen oqarpoq.

Taassuma soraarnerussutisiaqarnissamut aaqqissuussamik katersinissaq aamma tapersersorpaa, naak aamma nammineq aningaasanik maanna pilliuteqaraluaruniluunnit.

- Allatut ajornartumik tassa tamaappoq.

Attormiu 68-inik ukiulik Jens Inuusuttoq utoqqalinersiuteqarnermi saniatigut suli piniartuullunilu aalisartuuvoq.

- Taamatut ukioqqortusiartorluni nammineq pisinnaassutsip killeqaleriartornera malugisariaqarpoq, Jens Inuusuttup soraarnerussutisiaqalernissap pisariaqassusia taama oqaatigaa.