Aalisartut piniartullu soraarnerussutisisalernissaat sulissutigaat

- Aalisartunut, piniartunut aalisariutinilu inuttanut aaqqissuussaasumik maanna soraarnerussutisiassaqanngimmat, tamanna ilungersunartuuvoq, KNAPK-p siulittaasua, Leif Fontaine, oqarpoq.

Taamaammat KNAPK kingullermik ataatsimeersuarmat, marsip aqqaneq aappaani 2009-mi pisumi, aallartitat piumasaraat, kattuffik soraarnerussutisiaqalernissamik suliniuteqassasoq.

Naatsorsueqqissaartarfiup kisitsisaatai naapertorlugit, inuussutissarsiutigalugu piniarnermik allagartallit 2009-mi 2434-iupput.

Tassalu KNAPK-p Kalaallit Nunaanni Sulisitsisut Peqatigiiffiat, GA, suleqatigalugu naalagaaffeqatigiinerup iluani periarfissat misissornialerpai, ilaatigut Danmarkimi aalisartut kattuffiisa soraarnerussutissanut aaqqissuussisimanerat misissussallugu.

- Neriuutigilluinnarparput, naggaterpiaatigut soraarnerussutisiaqartarneq aamma aalisartunut inuttanullu periarfissanngorumaartoq, aalisartut piniartullu siulittaasuat oqarpoq.

Naak KNAPK ukiut 50-it sinnerlugit kattuffioreeraluartoq, aalisartut piniartullu soraarnerussutisiassanik aaqqissuussaasumik katersinissamut maannamut periarfissaqarsimanngillat. Maannali piffissanngortoq, Leif Fontaine oqarpoq.

- Ukiuni makkunani, inuiaqatigiit inuuniarnikkut inuussutissarsiornikkullu ineriartorfianni, pissutsit tamakkua atuuttut aamma aalisartunit piniartunillu atugaalernissaat pissusisamisoortutut isigisariaqarpoq, Leif Fontaine oqarpoq.

Leif Fontainep naatsorsuutiginngilaa, soraarnerussutisiaqartitsisalernissamut atatillugu pisortat suleqatigineqassasut.