Aalisartut piniartullu qiimmaallaatissaqalerput

Taamaasillutik ammit 3700-t juullip tungaanut tunineqarsinnaanngorput.

- Ukiormanna immikkut pikkorissartitsinerit sulititsiniutillu assigiinngitsut ingerlanneqaraluartut juullip tungaanut piniartut aalisartullu isertitaqartuarnissaat eqqarsaatigalugu taakku immikkut qinnuteqaataapput, aalisarnermut piniarnermullu naalakkersuisoq Ane Hansen taama oqarpoq.

Tassalu taassuma qinnuteqaatai marluk inatsisartut aningaasaqarnermut ataatsimiititaliaannit ullumi akuersissutigineqarput.

Puisit amiinik nuna tamakkerlugu tunisinermut 1,5 mio. koruuninik aningaasaliinissaq akuersissutigineqarpoq, tassalu nunatsinni piniartut amernik 3700-nik juullip tuingaanut tunisisinnaanngorput.

Aamma Qaasuitsup Kommuniani qaleralinniarfinni aalisaataarsiutinik saliisitsinissamut Namminersorlutik Oqartussat 500.000 koruuninik tapiipput.

Qaasuitsup Kommuniani borgmesteri Jess Svane saliinissamut aningaasaliineq pillugu ima oqarpoq:

- Aningaasartai soorunami iluatigalugit aningaasaqarnermut ataatsimiititaliatsinnut isummerfigitipparput, uagut 200.000-inik tunniussisinnaaneq nalunaarutigivarput.

Saliisitsinissamut aningaasanik neqeroorut qujamasuutigigaluarlugu borgmester Jess Svanep isornartoqartippaa:

- Ilisimavarput ukiup taamaalinerani saliiniarneq angallammik angilaartumilluunniit ajornakkusoortorujussuusartoq. Avannaani massakkut imarluppoq sikuniartorujussuullunilu taamaammat aningaasat atorneqarumaarnissaat qularivara, aamma siammasittuunngilaq, immaqa angallatit pingasut saliisinnaassapput. Kissaatiginerpaajugaluarparput pisasseeqilaarsinnaaneq, juullilluunniip tungaanut.

Tamatumunngali Ane Hansen ima akivoq:

- Ilisimavarput ukiut siulii eqqarsaatigalugit decembarip aallartilaarnerani avannaani aalisarneq tamarmi unereertartoq. Kisianni ukiormanna aalisagartassanik qinnuteqarnerit imaaginnaavinnikuupput, isumaqarpungalu saliisinnaanngikkaanni aamma aalisartoqarsinnaanngitsoq, Ane Hansen oqarpoq.

Aamma nunatsinni piniartut juullip tungaanut puisip amiinik tuniseqqissinnaanngorput.

- Isertitassamut tunngatillugu ajornartorsiortut eqqarsaatiginerullugit aningaasaliissutaapput, Ane Hansen oqarpoq.

Tassalu 1,5 mio koruuninik aningaasaliinikkut ammit 3700-t nunatsinni piniartunit tunineqarsinnaapput.

- Taamaalilluni immaqa ullumininnguani amernik tuniseqqilaarsinnaaneq qulakkeerneqarsinnaaniassammat, Jess Svane oqarpoq.

Aaisaataarsiutinik saliinissaq aaqqissuunneqarnissaa atorfilittanit maanna misissuiffigineqaleruttorpoq.