Aalisartut piniartullu pillugit ullumi erfalasulisartoqartoq
Aalisartut piniartullu ullumi ulloq ulloraat. Ulloq manna pisortatigoortumik aamma erfalasulisarfinngorpoq.
Inatsisartummi aalisartut piniartullu ullorsiornerannut atatillugu pisortat suliffeqarfiini tamani ukioq manna siullermeertumik erfalasulisartoqarnissaa aalajangerpaat. Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg tusagassiuutinut nalunaarummi allappoq.
- Aalisartut piniartullu ulluat pingaaruteqarluinnarpoq. Aalisarneq piniarnerlu nunatsinni nunatsinnullu inuussutissarsiutaapput pingaarutillit. Taamaattumik aalisartut piniartullu nunatsinnut tunniuttagaannut Naalakkersuisut nersorinninnissaat pingaaruteqarpoq, Peter Borg oqarpoq.
Nunatsinni inuussutissarsiutit pingaarnersaat
Aalisarnerup silarsuaani aalisarnermulluunniit atatillugu suliffissuaqarfinni niuerfinnilu inuit 4.300-nit amerlanerusut suliffeqarput, taakkulu nunarput tamakkerlugu sulisut tamarmiusut 15 procentit missaanniipput. 2016-2024-mi umiatsiaararsorluni aalisarnerup ineriartornera pillugu nalunaarutip piffissami tassani aalisartut 147-nit amerlanerusut takutippaa, Peter Borg oqarpoq.
- Aalisarneq suli ineriartortoq inuussutissarsiutitullu pilerigineqarluartoq takuneqarsinnaalluarpoq. Aamma arnanit, arnat aalisarnermi piffissami tassani amerleriarsimapput.
Aalisarnermut inatsisip ukioq manna januaarip aallaqqaataani atuutilersup timitalernissaa suli sulissutigineqarpoq, tassanilu patajaatsunik siunissamullu ungasinnerusumut tunngavissaqarnissaq qulakkeerneqassaaq. Tassani nalunaarusiornikkut aaqqissuussinerit paasissutissanillu tamanut saqqummiussisarnerit Peter Borgip inuussutissarsiornermi siunissamut qulakkeereeqataassasorai.
Piujuartitsisumik atuineq
Naalakkersuisuttaaq Aalisarneq Pillugu Ukiumoortumik Nalunaarusiaq 2024-meersoq Inatsisartunut maanna nassiunneqarsimasoq erseqqissaatigaa. Nalunaarusiaq taanna aalisarnerup aqutsivigineqarneranut “assigiinngisitaartumik ataatsimut takutitsivoq”, taamaalillutik inuiaqatigiit pisuussutinik ataatsimoorussanik atuinermut ataatsimut paasissutissarsisinnaapput.
Piniarnermut aallaaniarnermullu susassaqarfik nutarteriffigalugu 2023-mi 2024-milu inatsimmik nutaamik atulersitsiffigineqarpoq. Peter Borgip oqarnera naapertorlugu taanna piniagassat pillugit uumassusilerinikkullu illersorneqarsinnaasumik inatsisitigut naleqquttumik qulakkeerinninnissaq siunertarineqarpoq.
Nunarput tamatuma saniatigut imaani miluumasut nunat tamalaat akornanni isumaqatigiissutinut assigiinngitsunut pituttorsimavoq, taakku aalajangiisoqarnerani eqqarsaatigineqassasut, naalakkersuisut erseqqissaatigaa.
- Piujuartitsisumik atuineq kiisalu pinngortitatsinni pisuussutinik pitsaanerusumik annertunerusumillu atuineq pitsaalluinnartuuvoq kikkullu tamarmik akisussaaqataapput taamaalillutik kinguaassavut kalaaliminernik naleqarteqisatsinnik aamma nuannaaruteqarniassammata.
