Aalisartut Piniartullu partiiata atsiortitsinernut partiit allat suleqatiserai
Aalisartut Piniartullu Partiiat isumaqarpoq, silap allanngorneranik inuiaat kalaallit inuuniarnikkut eqqugaasut aningaasanik taarsiivigineqarnissaat partiit ataatsimut suliniutigisariaqaraat, taama Aalisartut Piniartullu Partiiata siulittaasua Leif Fontain tusagassiuutinut nalunaarpoq.
Aalisartut Piniartullu Partiiata nunatsinni partiit tamaasa maanna kajumissarpai nunarput tamakkerlugu atsiortitsinissamut suleqataaqqullugit akisussaaqataaqqullugillu.
Atsiortitsineq taarsiivigineqarnissamik piumasaqaatitaqartoq naammassippat EU-mut FN-mullu susassaqartunullu allanut apunneqarumaarmat, Leif Fontain allappoq.
Piumasarineqartoq anguneqassappat nunatsinni ajunaarnersuarmut aningaasaateqarfimmik pilersitsisoqarsinnaalissaaq inuuniarnikkut inuutissarsiornikkullu inuiaat eqqugaasut ullunut nutaanut naleqqussarnissaannut atorneqarsinnaasumik.
Aalisartut Piniartullu Partiata isumaqatigaa EU-mi siulittaasup Barroso-p qallunaallu statsministeriata Anders Fogh Rasmussen-ip erseqqissarmassuk nunatsinni silap allanngoriartornerata inuiaqatigiinnut sunniutai nunatsinni partiit nammineerlutik avammut suaartaatigisariaqaraat.
Leif Fontainip KNAPK-mi siornagut siulittaasuunerata nalaani KNAPK ukioq 2001-mi naalakkersuisunut inatsisartunullu piniartut aalisartullu taarsiivigineqarnissaannik aamma piumasaqarnikuuvoq.
