Aalisartut piniartullu inuussutissarsiumminnik iluamik ingerlatsisinnaajunnaarput
Nunat Avannarliit Siunnersuisoqatigiivisa Oslo-mi ataatsimiinnerannut atatillugu avatangiisinut ministerit tusagassiortunik katersortitsineranni Nunatsinni Avatangiisinut naalakkersuisup Arkalo Abelsenip issittumi nunallit immikkut sammivai.
Allattoq Elisa Isaksen
oktobarip 31-at 2007 14:52
- Ministerit ataatsimeeqatigiinneranni avatangiisinut ministerinut erseqqissarpara, Nunatsinni aalisartut piniartullu inuussutissarsiutiminnik iluamik ingerlatsisinnaajunnaarmata. Kinguaariippassuarni ileqquusutut ukiuunerani piniariarsinnaajunnaarnikuupput, Arkalo Abelsen avatangiisinut ministerit ataatsimoorlutik tusagassiortunik katersortitsineranni oqarpoq.
- Kalaallit Nunaanniit iliuuseqartoqarnissaa kissaatigaarput, taamaattumik naalagaaffiit amerlanerusut nukissiuutinik allanik soorlu erngup nukinganik imaluunniit anorisaatinik innaallagissiortunik atuilernissaat uatsinnut pingaartorujussuuvoq, Arkalo Abelsen oqarpoq.
