Aalisartut piniartullu ikiorserneqarsinnaapput

Ukiorluppallaarnera pissutaalluni Uummannami aalisartut piniartullu inunnik isumaginnittoqarfiimmiit ikiorneqartariaqarsimasut januaarip qaammataani 15-iupput, februaarip qaammataani quliullutik. Tassanilu eqqartorneqartut tassaaput aalisartut piniartullu aapaqanngitsut.

Uummannap kommuniani aalisartutut piniartutullu nalunaarsorneqarsimasut februaarip qaammataani 320-nik amerlassuseqarput. Ukiorluppallaarneralu pissutaalluni kommunimut ikioqqullutik saaffiginnissuteqartartut februaarimi quliusut amerlanerusinnaagaluartut ilimagalugu kommunimi isumaginnittoqarfimmiit oqaatigineqarpoq.

Ikiorneqaqqusut tassaanerupput aapaqanngitsut, aammalu ilaqutallit saaffiginnissinnaagaluartut kommunimi isumaginnittoqarfimmi allaffimmioq Dorthe Olsen oqarpoq. Dorthe Olsen aamma oqarpoq aappallit saaffiginnikkaangata piumaffigisarlugit isertitami ineqarnermullu atatillugu aningaasartuutit naatsorsuutaat takujumallugit, ikiorsiinissamut aalajangiisuussammata.

Aalisartut piniartulluunniit saaffiginnittartut suliffissaaleqisutut nalunaarsorneqartarput, nalunaarsoreernerisalu kingorna ikiorneqarsinnaalersarlutik, nerisassassarsiutissaanullu ikiorsiissagutta meeraqarsimagunik, ilanngullugit naatsorsuutaasarlutik. Aalisartut piniartulluunniit Isumaginninnermut immikkoortortaqarfimmut saaffiginnittartut qulit ikippallaarput, saaffiginnikkumasoqartanngilarli ilai innimisuttarmata.

Ikiorneqarnissamulli aalajangiisuusarput isertitat amerlassusiat, akiligassaallu naatsorsuutigereerlugit amigartoorpata ikiorneqarsinnaapput, sinneqartoorpatali ikiorserneqarsinnaanngillat.