Aalisartut piniartullu ikiornialerpaat

apriilip 27-at 2005 11:13

Inatsisit malillugit piniartut aalisartullu umiatsiaararsortut namminersortutut isigineqartarnerat pissutigalugu silapilutsillugu annertussusileriikkanik ikiorsiissutinik pisinnaaneq ajorput.

Ane Hansen-ip piniartut aalisartullu umiatsiaararsortut silapilutsillugu piniarsinnaanngikkaangamik annertussusileriikkamik ikiorserneqartalernissaanik siunnersuutaa ullumi inatsisartuni eqqartorneqassaaq. KNAPK-millu siunnersuut tapersersorneqarluarpoq. KNAPK-mi siulittaasunngoqqammersoq Peter Olsen ima oqarpoq:

- KNAPK-p maannamut ilisimasai tunngavigalugit, kommunit assigiinngitsumik annertussusileriikkamik ikiorsiisarnerat ajornartorsiutigaarput. Taamaattumik kommunit assigiinnerusumik annertussusileriikkamik ikiorsiisarnissaat KNAPK-p kissaatigaa, taamaammat Ane Hansen-ip inatsisartuni siunnersuutaa taperserparput, Peter Olsen KNAPK-p siulittaasua oqarpoq.

Ane Hansen-illip siunnersuutaa naalakkersuisut akissuteqaatiminni tapersinngilaat, inatsisiliornerup siunertamut naapertuunnissaa isumannaatsumillu allaffissornikkut ajornartorsiutaasinnaanissaa naatsorsuutigineqarmat. KNAPK-mit siunnersuutip naalakkersuisunit taperserneqassanngippat KANUKOKA suleqatigalugu anguniarneqarpoq.

- Inatsiartut akuerissanngikkaluarpagu, KNAPK-p ataatsimeersuarnermini isumaqatigiissutigereerpaa taannarpiaq sulissutigissallugu, taamaammat sulinianerput ingerlatiinnassavarput, Peter Olse oqarpoq nangillunilu;- KANUKOKA aqqutigalugu sulissutiginissaa naatsorsuutigilluinnarparput, anguniakkatsinneereerpormi kommunet akornanni assigiinnerusumik angissusileriikkamik ikiorsiisoqartalernissaa. Taama oqarpoq Peter Olsen. KNAPK-mit ilisimaneqanngilaq nunatsinni piniartut aalisartullu umiatsiaararsortut 9.000-it missanniittut qanoq amerlatigisut annertussusileriikkamik ikiorserneqarsimanersut.

Inatsisartuni Isak Davidsen-ip oqallissaarutigaa nunatsinni aalisartut piniartullu umiatsiaaqqanik angallatillit umiatsiaaraat EU-p piumasaqaatai tunngavigalugit atoqqusaajunnaassappata, nunatsinni qinikkanit naalakkersuisunillu umiatsiaaqqanik taarsersuisoqarnissaanik piareersimasoqarnersoq.