Aalisartut piniartullu atukkatik pitsanngorsaqquaat
Siullertut, aalisartut piniartullu inuussutissarsiutiminnik annaasaqarsimatillugit ikiorsiissutit ukioq sunngitsoq nungoreertarnerat iluarsiivigeqquneqarpoq. Taamalu ukioq kaajallallugu aningaasaliisoqartalernissaa siunnersuutigalugu.
Aappaattut, sillimmasernissamut tunngasut eqaannerulersinneqarnissaat aamma angallatinik sillimmasiisarnerup iluaqutaanerulersinnissaa anguniaqquneqarpoq.
Kingullertullu inuussutissarsiutitigut tapersiisarneq ESU massakkornit sukangannginnerulersittariaqartoq, KNAPK-p siulittaasua Peter Olsen oqarpoq.
Aalisartut Piniartullu Kattuffiata naalakkersuisunut saaffiginnissuteqarnerminut atatillugu aamma ataatsimiititaliamik piaartumik pilersitsinissaq siunnersuutigaa. Ataatsimiititaliaq ajornartorsiutinik sukumiisumik aaqqiiniartussaq taanna, KNAPK-p pisortallu peqataaffigissagaat, Peter Olsenip oqaatigaa, naggataagullu ima allalluni:
- Aalisarneq piniarnerlu inuussutissarsiutit annersaraat, taamaattumillu suleqatigiinnitsigut maannamut aporfiusinnaasut oqaloqatigiinnikkut piaartumik aaqqinneqarnissaat kattuffimmit piumasaraarput.
