Aalisartut pikkorissartinneqarnerat iluatsippoq

- Pikkorissaaneq iluatsilluarpoq, Kommuneqarfik Sermersuup inerisaanermi ataqatigiissaarisua Kúnak Lorentzen ilisimatitsivoq.

Aalisartunik piniartunillu pikkorissartitsinermi aquuteralannik suliarinninnermik, aserfallatsaaliinermik iluarsaanermillu suliaqarneq, suliffeqarfimmit Arctic Waves Maniitsumeersumit pikkorissaatigineqarpoq.

- Aamma Aalisartut Piniartullu Kattuffiata, KNAPK-p, aaqqissugaanik assersuutigalugu aalisariummik angallatitaarnianut piumasaqaatinik periarfissanillu sammisaqartitsisoqarpoq, Kúnak Lorentzen nassuiaavoq.

Pikkorissartitsineq tulleq Tasiilami ataasinngorpat aallartissaaq, tassani motoorinik paarsinerup saniatigut angallatinik glasfiberiusunik iluarsaaneq Tasiilami suliffeqarfiit ilaannit ilinniartitsissutigineqassalluni. Aamma ikiueqqaarneq ilinniarneqassaaq. Tasiilami qatserisartoqarfik suleqatigalugu qatserinermik ilinniartitsisoqassaaq.

Tasiilamissaaq piumasaqaatinik periarfissanillu angallatitaarnianut sammisaqartitsisoqassaaq.

- Pikkorissartitsinerit taakku marluk aalisartut inuussutissarsiutaannik aappaagu pikkorissaaqqinnissanut aallaaviussapput. Pikkorissartitsinerit KNAPK-p, Paamiuni Imarsiornermik Ilinniarfiup aamma Kommuneqarfik Sermersuup aaqqissuutissavaat, ataqatigiissaarisoq oqarpoq.