Aalisartut partiillu siulittaasui attaveqatigiissimanngillat
Sapaatip-akunnerata naanerani aalisartut Nuummi umiarsualivimmik assersuinerannut atatillugu KNAPK-p aamma partiit tamarmik siulittaasuisa akornanni attaveqatigiittoqarsimanngilaq.
Allattoq Jens Thorin
juulip 06-at 2009 15:03
Aalisartut assersuisut sinniiisaat, Malaaraq Bourup Nielsen, ippassaq unnukkut radioavisimut taama oqaraluartoq, tamanna KNAPK-p siulittaasuata, Leif Fontainep ilumuunnginerarpaa.
Aalisartut sinniisaat oqarpoq, assersuinertik taamaatillugu, Naalakkersuisut tapiissuteqarniarlutik neriorsuimmata.
Kisianni Naalakkersuisut siulittaasuata Kuupik Kleistip erseqqissaatigaa, sumilluunniit neriorsuuteqarsimannginnamik.
- Aalisarnerup siunissaa pillugu Naalakkersuisut aalisartullu kattuffiisa akornanni itisuumik oqaloqatigiinnissaq pisariaqarpoq, tamannalumi aamma aallartereerpoq.
KNAPK-mik oqaloqateqarnerput ulluni tulliuttuni nangissavarput, Naalakkersuisut siulittaasuat Kuupik Kleist oqarpoq.
