Aalisartut naammagittaalliuutaat Ombudmandimit misissorneqarput
Naalakkersuisoqarfiup sulianik ingerlatsisimanerata pitsaassusaanik aammalu taama amerlatigisunik itigartitsisoqarsinnaanera inatsisitigut tunngavissaqarnersoq Inatsisartut Ombudsmandiata maanna misissorpaa. Inatsisartut Ombudsmandiat, Vera Leth, tusagassiorfinnut nalunaaruteqarluni taama allappoq.
Misissuinerli qaqugu naammassineqartussat naatsorsuutigineqarnersoq oqaatigisinnaannginnerarpaa.
Aalisarsinnaanermut akuersissutinik itigartitsisimanerup tusagassiuutini sammineqarneranut Aalisarnermut naalakkersuisoq qisuariaateqarpoq. Malittarisassat atuuttut allanngortinneqarnissaannik Naalakkersuisut suliniuteqarniartut Karl Lyberthip nalunaarutigaa. Ilaatigut inuusuttut aalisarnermik inuussutissarsiornermut ajornannginnerusumik appakaassinnaanissaat sulissutiginiarpaa.
Allannguutilli ingerlaannaq atuutilersinneqarsinnaassanngillat. Nalunaarutip allanngortinneqarnissaanik siunnersuut Naalakkersuisut juunip qaammataani tusarniaassutigissavaat, tamannalu pereerpat aappagu ukiakkut ataatsimiinnissami aalisarnermut inatsimmut allannguutissatut siunnersuuteqassallutik.
Aalisarneq Nunatsinni inuussutissarsiutit pingaarnersariuartuarsinnarpaat. Tamanna Sulisitsisut Peqatigiiffiannit uppernarsarneqarpoq. Nunatta karsia siorna 475 millioner koruunik aalisarnermit iluanaaruteqarpoq.
