Aalisartut avissaartuupput

Kummersualinnut paragrafip, aalisarnermut naalakkersuisup Karl Lyberthip atuutilerseqqikkusutaata, oqallisigineqarnera eqikkaraani, taama aperisoqarsinaavoq.

Aalisarneq pillugu inatsimmi paragrafi, aalisarnissamut akuersissuteqassagaanni, isertitat tamarmik 50 procentii aalisarnermiissuunissannik piumasaqaataasoq, Naalakkersusut siuliisa atorunnaarsippaat.   Tassalu atuutilerseqqinneqarpat, aaliakkanik tunisassiorfissuit aalisarnermik ingerlatsisinnaajunnaassapput.

Mikisunilli akunnattumillu angissusilinnik aalisariutaatillit KNAPK-mi ilaasortaasut isumalluarput.

- Aalisartut aalisassapput, tunisassiortullu tuniasassiussapput, allamik naamik. Imaanngitsoq tunisassiortut aalisakkanik piginnittuullutillu aalisarlugillu pisut, KNAPK-p pisortaa Petrus Biilmann oqarpoq.

Kummersuarnut paragrafi eqquteqqinneqarpat tamanna sinerissap qanittuani aalisartunut iluaqutaassasoq, taassuma oqaatigaa, paragrafillu taassuma nassatarisinnaasassai ima nassuiaateqarfigalugit:

- Sinerissap qanittuani pisassiissutinik piginnittunngorsimagaluartut fabrikkit nunami tunisassiortuusut, taavalu avataasiutinik piginnittuusut imaluunniit nunami suliffiuteqartut 50 procenti eqquteqqinneqassappat, taava soorunami pisassiissutit taakku pisiarisimasaat Namminersorlutik Oqartussanut tunineqartariaqassapput utertiinnarneqarsinnaanngimmata, taavalu sinerissap qanittuani aalisartukkut qutsannaqaat taamaalillutik aalisagartassaminnik pisiortoqqissinnaanngussagamik, KNAPK-mi pisortaq Petrus Biilmann oqarpoq.

Qeqertarsuup Tunuani qaleralittassiissutit tamakkerneqalernerat pissutaalluni tamaani qaleralinniarneq ullumi sisamanngornermi unissasoq, Radioaviisimi ippassaani oqaluttuaraarput.

Tamanna tamaani aalisartunut ajornartorsiutaavoq, tassami qalerallit Qeqertarsuup Tunuani pisarineqarsimasut tunineqarnerini akii assersuutigalugu Upernavimmi Uummannamilu akinut qaffasinnerunerat pissutaalluni pisassiissutit nungujaarnerusarmata.

Kummersuarnut paragrafi eqquteqqinneqarneratigut tamassuma umiatsiaararsortunut iluaqutaanissaa, Petrus Biilmannip neriutigaa, tunisassiortullu annerit, assersuutigalugu Polar Seafoodip paragrafimik taassuminnga eqqussisoqarniarneranik illuatungiliunnera paasisinnaannginnerarpaa:

- Taamatut pisoqassappat, tassa kummersuarnut paragrafi eqquteqqinneqassappat, fabrikkit matoorartariaannanngorlugit patsisigisarpaat, kisianni tassa taanna ukiut 20-t kingullit tusartuartarnikuuarput patsisaasoq. Kisianni taamaanngisaannarnikuuvoq, maannakkut sulisitsisuninngaanniit taamatut oqaatigineqarpoq, massakkullu aamma Polar Seafoodimi siulittaasuusoq Henrik Lethip taamatut oqartarnera siutigut ameerlugit tusaasareernikuuarput, tamannalu pissusissamisuunngilaq, KNAPK-p pisortaa Petrus, Biilmann oqarpoq.

Sulisitsisulli Peqatigiiffianniit, GA-miit, unikaallaqqusipput.

Aalisarnermi ajornartorsiuteqarpoq, kisianni maanna iliuusissaq aaqqissuutaasinnaangitsoq, tassani isumaqarput.

- Mannakkut ajornartosiutaavoq, aalisarnermi naammassisinnaasat ukiut ingerlaneranni anertusitikkiartuaarneqarsimapput , taamaalilluni kilisaatit ikileriarujussuartillugit. 1990-it 50-inik avataasiuteqarpoq, taamattut maanna afieq marluupput. Tassalu taamaammat aalisartut piginnittullu ikinnerulersimapput. Kisianni taamaannerra aaqqinneqarsinnaanngilaq oqarluni, aaliariutaatillit piginittuujunnaassasut. Taava kinguaariit tulliisa piginnittunngornissaat isumagineqartariaqarpoq, taamaalilluni nutaanik piginnittoqalersillugu. Tassa tamanna isiginiarneqartariqartoq, piviusunngorsinnaangitsunik inatsisiliorniarsarinani, GA-p aalisarneq pillugu immikkoortortaani siulittaasoq, Henrik Leth, oqarpoq.

Suliffeqarfiit aalisarnermik aamma tunisassiornermik ataatsikkut ingerlatsinerisa taamaatiissutigisassaannik inatsit allanngortinneqarpat, taava suliffeqarfik siulittasuuuffigisaa, Polar Seafood, tunisassiorunnaarniarpoq, aalisarjneinnarmik aallutaqalerluni. Tamannalu aalisartunut iluaqutaanavianngitsoq, Henrik Leth isumaqarpoq.

Paarttuanimmi iliornissaq, tassalu piginneqatigiiffiup tunisassiorfiutini kisiisa aallutilerlugit, kilisaataatini tuniniatraluarpagit, raajarniat mikisunik aalisariutaatillit 200 300 millionit koruuninik imaaliallaannaq akiliisinnaanavianngitsut, Henrik Leth isumaqarpoq .

 - Taamaaliorniaraluarutta uppernarsineaannassagunarpoq, aalisarnermi piginnittoqarnerup allanngortinniarneqarneranut aningaasat pisariaqartinneqartut pigineqanngitsut, Henrik Leth oqarpoq.