Aalisartut atortussaminnik piseqqusaanngillat

Aalisarneq pillugu Aalborgimi naapeqatigiinnermi kalaalerpassuit peqataapput, ilaalli angallatiminnut atortussaminnik pisiniaraluarlutik Royal Greenlandimut innersuunneqaannartarput Royal Greenland tuniniaasartunut immikkut isumaqatigiissuteqareersimammat.

- Angallatima atortussaanik pisiniaraluarama oqarfigineqarpunga, taamaaliorsinnaanngitsunga tamakku Royal Greenlandimik isumaqatigiissuteqarfiusimammata,

aalisartoq kilisaammillu piginneqataasoq Nuka John Olsen Bikki P. Josefsen-mit oqaloqatigineqarluni taama oqarpoq.

Royal Greenlandimi pisortaq, Henrik Leth oqarpoq, tuniniaasunut immikkut isumaqatigiissuteqarsimanermigut Royal Greenland kisermaassilluni aalisartut atisaannik tuniniaasinnaasimasoq.

Tuniniaasartut qasserpiaat isumaqatigiissuteqarfigisimanerlutigit oqaatigisinnaanngilara kisianni Royal Greenlandip qalulerivittaata tuniniaasartunut isumaqatigiissutigineqarmat aalisartut atisassaat kisermaassilluni Royal Greenlandimit tuniniartarpavut, Henrik Leth radioaviisimut oqarpoq.

Henrik Lethilu erseqqissaavoq aalisartut sulinerminnut atatillugu atisaat tuniniarneqartartut akitsornagit tuniniarneqartussanngussasut.

KNAPK-lli siulittaasua Peter Olsen aalisartunut tapersiilluni oqarpoq, Royal Greenlandip kisermaassilluni tuniniaasinnaatitaanera akuerineqarsinnaanngilluinnartoq.