Aalisartut assersuinissartik taamaatippaat
Umiarsualivimmik assersuinissaq SIK-mit Sulisitsisullu Peqatigiiffiannit isornartorsiorneqartoq KNAPK-p qullersaqarfianit tapersersorneqanngilaq, taamaattumillu taamaatiinnarneqarluni.
Nuummi Aalisartut Piniartullu Peqatigiffiata Nuummi umiarsualivimmik assersuiniarnera piffissaq kingulleq atorlugu taamatiinnarneqarpoq. KNAPK-mit tapersersorneqarnissamik peqatigiiffiup saaffiginissutaanik itigartitsineq peqqutaavoq.
Inatsisitigut unioqqutitsilluni assersuinissami eqqartuussivilersuuneqarnikkut kingunerusinnaasut akissaqartinneqannginnerat peqqutaaqataatinneqarpoq.
Tapersersorneqarnissamik saaffiginnissutip itigartinneqarnera NAPP-mi isulittaasup Lars P. Mathæussenip uggoreqaa:
- Tassami saarullinniat kisiisa eqqarsaatigissagaanni septembarip 26-ani kingullermik tunisisoqarpoq, Lars P. Mathæussen oqarpoq.
KNAPK-p sakkortunerusumik pissusilersornissaa, NAPP-mit aamma neriuutigineqaraluarpoq:
- Kisianni pissutsit piviusut aallaavigalugit allatut ajornartumik itigartitsinermut akuersiinnartariaqarnerput ullaaq nassuerutigiinnarparput, Lars P. Mathæussen oqarpoq.
KNAPK-mi siulersuisut sapaatiummat ippassarlu ataasingornermi ataatsimeereerlutik Naalakkersuisunut naaperiaanerusumik allagaqarput.
- Qinnuiginiarpassi, Aalisarneq pillugu Inatsisissap pingajussaaneerlugu ullumikkut suliarineqarnissaa naammassillugulu taasissutiginissaa, Inatsisartut upernaamut ataatsimiinnissaannut kinguartinneqassasoq.
Tassami allannguutissanut tunngasut suli itisilernerullugit paaseqatigiiffiusussamik oqaloqatigiissutiginissaat, KNAPK-mut ilaasortanullu immikkoortortaqarfinnut pingaaruteqarluinnarpoq.
NAPP assersuinissamik taamaatitsinermi kingorna iliuussissanik allanik pilersaaruteqanngilaq.
- Nukissaqanngilagut taama ittunik suliaqartassalluta, Lars P. Mathæussen oqarpoq.
Aalisarnermut inatsisssatut siunnersuut Inatsisartut ullup qeqqarluinnartoq akuersissutigaat.