Aalisartut aningaaserivinnit atugaat 18 millionit koruuniusut ESU-mut nuukkusunneqarput

Aalisarnermut naalakkersuisup Finn Karlsenip ullaaq Iterluarnaami oqaasiinut KNAPK-p siulittaasua Peter Olsen taama erseqqissaateqarpoq.

- Sinerissamut qanittumi aalisartut pineqartut tassaapput atsioqatigiillutik naalakkersuisunut ikioqqullutik saaffiginnissimasut. Taakku tunngavigalugit naalakkersuisut suleqatigiissitanik pilersitsipput, uagullu KNAPK-mit tassani peqataavugut, Peter Olsen oqarpoq.

Taakkunannga ningittagarsorlutik qaleralinniartunit 15-iusunit aalisariut ataaseq ningittagarsuutinik tamakkiisumik atortoqarpoq, aamma alla ataaseq tamakkiisuunngikkaluamik ningittagarsornermut atortoqarluni, sinnerilu ningittagarsornermut atortorissaarutinik peqanngillat.

- Uagut KNAPK-mit ilaatigut inassutigerusutatta ilagaat, aalisariutit pineqartut aningaaserivimmit attartugaasa ESU-mut nuunneqarsinnaanissaannik piginnaatitsissasut, Peter Olsen oqarpoq.

Atukkat ilaatigut Royal Greenlandip qularnaveeqqusersimasai tamarmik ESU-p ataani inissisimalernissaat anguniarneqarpoq.

Peter Olsenip politikerit ESU-mut iliuuseqaqqullugit aamma kajumissaarpai.

- Ukiuni kingullerni ESU-mit atorniarsinnaanissaq ajornarsilluinnarsimavoq, Inatsisartuni ilaasortat taamatut siunniussisimanerat kukkusuummat kajumissaarusuppavut tamanna allanngorteqqullugu. Tassami aalisartut taamaallaat aningaaserivinnut imaluunniit suliffeqarfissuarnut atorniarnissaminut periarfissaqarmat. Aalisartullu kissaatigisarpaa suliffeqarfissuarnit qilersorsimaneqarani aalisarsinnaanissani, taamaattumillu ESU-mit attartornissaq piumanerusarlugu, Peter Olsen oqarpoq.

Finn Karlsenip 50 – 100 millionit koruunit eqqartugai Peter Olsenip suminngaanneersuunersut paasisinnaanngilai. Aningaasammi pineqartut 18 millionit koruuniummata.

- Aningaaserivimmit atukkat ESU-mut nuunneqarusuttut 18 millionit koruuniummata KNAPK-mit uppernarsarsinnaavara, Peter Olsen naggasiivoq.