Aalisartut aningaasaatitik tigoqqissavaat
Akiliummik 1.500 koruuninik akiliuteqartitsisarneq taamaalilluni atorunnaarsinneqarpoq.
Aalisarnermut atatillugu atuisunut akiliuteqartitsineq pillugu Namminersornerullutik Oqartussat decembarimi 2012-imi aalajangersagaat tassunga tunngasut taamaalillutik atorunnaarsinneqarput.
Ukioq-mannalu januaarip ulluisa aallaqqaataannit atortussanngortinneqarput, kingumoortumik tiguneqarsinnaalssallutik. Tassa 2013-imut akileereersimasut akiliutiMik utertissinnaanissaannut periarfissaqassapput.
Akiliutigisimasat utertinneqarnissaat kissaatigineqarpat, Aalisarnermut, Piniarnermut Nunalerinermullu Naalakkersuisoqarfimmut qinnuteqaateqartoqassaaq. Aalisarsinnaanissamut akuersissummik pigisaqartup aqqa, inuttut normu, akiliutigisimasallu kontomut ikineqarnissaanut kont-normu ikisiffissaq qinnuteqaammi allassimassaaq.
Akiliutigisimasat utertinnissaannut piumasaqarneq decembarip ulluisa 31-ata tungaanut qinnutigineqarsinnaavoq. Piffissap taassuma kingorna utertitsisoqarnissaanik piumasaqartoqarsinnaassanngilaq.
Naalakkersuisut qinnuteqaataat Inatsisartut Aningaasaqarnermut- aamma Akileraartarnermut Ataatsimiititaliaani ilaasortat amerlanerussuteqartut pingasunngormat ataatsimiinneranni akuersissutigineqartoq, Aalisarnermut Naalakkersuisoq, Karl Lyberth, aamma ilisimatitsivoq.
Aningaasanik utertitsinissaq taamaatinneqartoq, aviisimi Sermitsiami ippassaq saqqummersumi allaaserineqaraluarpoq, taannali allaaserissaq
Aningaasaqarnermut Ataatsimiititaliap pingasunngormat suli ataatsimiinnginnerani allaaserineqarpoq. Tamanna Sermitsiaq.gl-imi ullumi ilisimatitsissutigineqarpoq.
