Aalisartut Ane Hansen avaallattarpaat

Aalisartut piniartullu ulloq manna tikillugu aatsaat taama amerlatigalutik akerliussutsimik takutitsipput. Nuummi Aalisartut Piniartullu Peqatigiiffiata, NAPP-ip, aaqqissuusaanik aalisartut piniartullu 500-t missaanniittut Inatsisartut ataatsimiittarfiata silataani aalisakkat tunisat akikippallaarnerat, tunitsivissaaleqinerit pisassiissutillu ikippallaat pinerullutik akerliussutsimik takutitsipput.

Akerliussutsimik takutitsisut qininngassimaarput ukiamilu silagissuarmi suaartartarlutik. Ingammik Aalisarnermut Piniarnermullu Naalakkersuisoq Ane Hansen isorineqarpoq, NAPP-milu siulittaasup Lars Mathæussenip Nuummi akerliussutsimik takutitsinermi tusarnaartut nalunaarfigai illoqarfinni tamani aalisartut piniartullu Ane Hansenip Aalisarnermut Piniarnermullu Naalakkersuisuujunnaarnissaa kissaatigigaat.

Naalakkersuisut Inatsisartunilu ilaasortat aalisarneq pillugu oqaaseqartartut akerliussutsimik takutitsisut Inatsisartut ataatsimiittarfiata silataanit malinnaaffigaat akerliussutsimillu takutitsineq pissutigalugu ukiaanerani ataatsimiinnermi ullormut oqaluuserisassat kinguartillugit.

Akerliussutsimik takutitsinermi oqaaseqartartut saarulliit akikinnerpaaffilerneqarnissaat uteqattaarpaat, oqaaseqartut ilaat aamma tassaavoq KNAPK-mi siulittaasoq Leif Fontaine.

Kuupik Kleist aamma Ane Hansen pissutsit, ingammik sinerissap qanittuani aalisarnermi, qanoq ililluni pitsanngorsarneqarsinnaanersut pillugit ataatsimeeqatiserinnipput.