Aalisartut akitsuutinut akissaqanngillat

Akitsuutit siunnersuutigineqartut avataasiorlutik aalisartut nammassinnaangikkaat, Naalakkersuisut nassuerutigaat.

- Akitsuutit attatiinnaraluarutsigit, aalisartitseqatigiiffiit saarullinniartut qaleralinniartullu arlallit akiliisinnaajunnaarsimassagaluarput, tamannalu siunertaanngilaq, Palle Christiansen oqarpoq.

Qalerallit saarulliillu avataani pisat akitsuusersorneqalertussaagaluarput. Saarulliit kiilumut koruunimik qaleraliillu kiilumut 2 koruuninik akitsuuteqalissagaluarput, Nunatta Karsiata 22 millioni koruuninik iluanaarutigisassaraluanik.

Aalisarnermik inuussutissarsiortut aningaasarissaarnerulersinniarlugit, maannakkut naleqqusaasoqassaaq. Allatut oqaatigalugu avataasiorlutik aalisartut ikinnerulissapput.

- Aalisagartassat aalisartunit amerlavallaanit aalisarneqarput. Pisuussutinut akitsuusersuissagutta, atuisut ikinnerulertariaqarput, taamaanngippammi aalisartitseqatigiiffiit arlallit annanngitsuussapput, Palle Christiansen oqarpoq. Taannali siunnersuumminik tunuartitsisariaqarnermini ajorsarluni oqarumanngilaq.

- Isertitassanik siunnersuuteqarpugut, misissorneqartussanik oqallisigineqartussanillu. Uanilu takusinnaavarput siunnersuuterput attanneqarsinnaanngitsoq, Palle Christiansen oqarpoq.

Tassalu nassueruutigaa, siunnersuusioramik sukkavallaalaarsimallutik.

- Aammami qinersinerup kingorna piffissaqarpianngilagut. Tassalu erserpoq, siunnersuutit ilaat iluarsaatilaagassaasut, unalu tamakkununnga ilaavoq, Palle Christiansen oqarpoq.

Qalerallit saarulliillu nunatsinni tunisassiarineqanngitsut akitsuusersornissaannut siunnersuut aningaasanut inatsisisssatut siunnersuummut ilaagaluarpoq, Nunatta Karsianut 22 millioni koruuninik isertitsissutaasussaagaluarluni.

Palle Christiansen ullumi oqarumanngilaq, aningaasat isertinngitsuukkat Naalakkersuisut suminngaanniit pissarsiarissaneraat.