Aalisartut akissutissaat utaqqivaat

Arctic Green Foodip aamma KNAPKp Maniitsumi immikkoortoqarfiisa aalisakkat akii pillugit isumaqatigiinniarnerit assigiinngitsunik isummersorfigaat.

Maniitsumi KNAPKp immikkoortoqarfii MUAPP aamma MAPP isumaqarput isumaqatigiinniarnerit avissaarfiusut. Isumaqatigiinniarfigisaatali Arctic Green Foodip pissutsit allaanerusumik isigai.

- KNAPK isumaqatigiinniutissamik saqqummiussaqarnikuuvoq taannalu Arctic Green Foodimit akineqarpoq tamatumali kingorna attavigiittoqarsimanngilaq tamannalu isumaqatigiinniarnerit avissaarfiunerattut taaneqarsinnaanngilaq, taama Otto Stach Arctic Green Foodimeersoq KNR-imut oqarpoq.

Aalisartut naammaginngilaat Arctic Green Foodip piumasaa tassalu aalisakkat niaquerlugit tulaanneqartarnissaat. Tamannali piumasaqaatitut avaqqunneqarsinnaanngitsutut isigineqassanngitsoq Arctic Green Food nalunaarpoq.

- Ukiariartornerani saarulliit Arctic Green Foodimut tunineqartut 97 procentii ilivitsuutillugit tunineqarput. Aalisartulli ilaasa toqqarsinnaasarpaat niaquereerlugit tulaannissaat taamalu aki pitsaanerusoq angullugu tassanilu aamma Arctic Green Food aningaasartuutissaanik ikilisaanneqartarpoq, taama Otto Stach oqarpoq.

Nassuerutigaali akit pillugit aalisartut piumasaat Arctic Green Foodip peqataaffigisinnaanngikkai.

- Arctic Green Food isertitaqarnerusariaqarpoq aki KNAPKmit piumasarineqartoq anguneqassappat, taama Otto Stach oqarpoq, erseqqissarpaalu KNAPKmit akineqarnissartik maanna utaqqigitsik.