Aalisartut akiitsunut akilersueqataanersut misissoqqissaaqquaat
Naalakkersuisut siulittaasuata Hans Enoksenip namminersorneq pillugu paasisitsiniaanermut atatillugu Uummannamiinnerani, inatsisartuni ilaasortap Anthon Frederiksenip apeqquteqarneratigut Royal Greenlandip aalisakkanut akigititai pillugit oqallinneq aallartippoq.
KNAPK naapertorlugu naalakkersuisut siulittaasuat Hans Enoksen oqarsimanerarneqarpoq Royal Greenlandip akiitsui annertoorujussuusut, qularnanngitsumillu aalisartunit akilersorneqartut, tamakkulu tamarmik qulaajarneqartariaqartut.
Aalisakkanik eqqaanerujussuarmut Finn Karlsenip uparuaaneranut, KNAPK akissummini ima aperivoq:
- Aalisakkanik qaqinneqartartunik eqqaasoqartarsimappat, taava naalakkersuisut sooq qanoq iliuuseqanngillat?
Malittarisassat Finn Karlsenip naalakkersuisoqarfianeersut naapertorlugit, aalisartut pisortat suliffissuaataannut tulaassisussaatitaapput! Taamaattoqarnera pissutigalugu aalisartut ilaasortavut akiluttorfigisaapput! KNAPK allappoq.
Naalakkersuisut siulittaasuata KNAPK ilaasortaminut pitsaanerusumik angusaqarsimasinnaagaluarneranik uparuaanera, tunngavissaqartinngilaat.
- Naalakkersuinikkut suliaasumik inatsit naapertorlugu aalajangersagaammat nunatsinni aalisagaq nunamut tulaanneqassasoq nunamilu suliarineqassasoq, aamma naalakkersuisut akuersinngippata nunatsinni aalisagaq toqqaannartumik avammut tuneqqusaanngilaq!
KNAPK akissuteqarluni ilaatigut allappoq.