Aalisartut akerliussutsimik takutitsipput
Kisianni qanoq aalajangiisoqarnersoq suli tusagaqarfiginngilarput.
Ataaserli nalunanngilaq
Sisimiuni aalisartut tunitsivitigut aaqqiisoqanngippat, akerliussutsimik takutsitsillutik ullumi ingerlaaqatigiissapput.
- Ullumi umiarsualivimmi kommunip qalulerivianinngaanniit ataatsimut aalisartut ingerlaaqatigiissapput kommunip allaffiata tungaanut, Sisimiuni aalisartut siulersuisuini ilaasortaq, Leif Fontaine oqarpoq.
Taassuma ukiuni kingullerni angisuunik saarullippassuaqartanera atorluarusukkaluaqaa.
Pissutsit taamaaginnarpata Sisimiuni aalisartut umiarsualivitsik matussavaat.
- Pissutsit taamaaginnassappata aalisartut aaliangiusimavaat umiarsualivimmik assiinissartik, Leif Fontain oqarpoq.
Kruse kisimi aaliagiisinnaannginnerarpoq
Aalisarnermut naalakkersuisoq, Karl Kristian Kruse, paasisagut naapertorlugit sulinngiffeqartoq, radioaviisip aaqqissuunnerani attaveqarfiginiaraluaratsigu iluatsinngilarput. Qanoruumulli ippassaq ima oqarpoq.
- Kisimiillunga aaliangiisinnaatitaafiimmik peqartuuguma sukkanerusumik naammassineqarsinnaallutik isikkoqassangaluarpoq kisiannili naalakkersuisut suleriusiat malillugu naalakkersuisuni iluani isummernissaq qanoq inerneqassanersoq pitinnagu oqareersinnaanngilanga qanoq naammassineqassanersoq, kisianni neriuutigaara naalakkersuisut sinnerinit akuerineqarsinnaassasoq, aalisarnermut naalakkersuisoq, Karl Kristian Kruse Qanoruumut oqarpoq.
Aamma atuaruk Sisimiuni aalisartut tunitsiviliisoqarnissaanik ilungersuuteqartut
Taava aallajangiisinnaassuseqarnerulersimassanersoq pissanganarpoq, taassami Naalakkersuisoqarfianiit pisortaq, Jørgen Isak Olsen KNR-imut ullumi naatsumik allappoq, umiarsuarnik tunitsiviliisinnaanermut periusissiat allanngortinnissaanut innersuussutigineqartut pillugit ullumi naalakkersuisut ataatsimiinnerminni oqaluuserissagaat. Akuerineqarsinnaappatalu aalisarnermut naalakkersuisoq nammineerluni aalajangiisinnaassuseqassaaq.
