Aalisartut akerliupput
Akerliussutsimik takutitsisut piumasaaraat aalisarnermut inatsissap, Inatsisartuni aqagu pingajussaanerlugu eqqartorneqartussap, kinguartinneqarnissaa.
Aalisartut aalisarnermut inatsisissap tunuartinneqarnissaanut kissaateqarnerminni tunngavilersuutigaat, aalisarnermut attuumassuteqavinngikkaluartut aalisarnermi piginneqataasinnaalernissaannut akuersaannginnertik:
- Aalisarnermut inatsisissaq inuiaqatigiinnut kalaallinut tulluutinngilluinnarpoq. Tassami eqqortumik oqassuugut; Aningaasaatillit kisimik iluatsitsissapput aalisagartassanillu tigusissapput akissallit, Anton Lindenhann, Ilulissani aalisartut piniartullu peqatigiiffianni siulittaasup tullia oqarpoq.
Taamaammat allanngortitsisoqarnissaa assorsuaq kaammattuutigaluarparput. Politikerillu tusarsinnaanngikkunik tunuartariaqarput, Anton Lindenhann oqarpoq.
Taassuma SIK-p aalisartut akerliussutsimik takutitsinerannut tapersuinnginnera paasimiunaatsippaa:
- Maani SIP-p tapersersorluta nalunaaruteqarfigivaatigut kattuffiatali akerliussutsimik takutitsinermut peqataasoqannginnissaa suaarutigisimallugu, Anton Lindenhann oqarpoq.
SIK-p siulittaasua Jess G. Berthelsen aalisartut akerliussutsimik takutsinissaannut tallimanngormat tapersersuinani nalunaaruteqarpoq. Aalisartummi sulisartunut sanilliullugit ukioq manna isertitaat annertuumik qaffaasimapput. Aalisartut tunisaasa nalinig 2010-mut sanilliullugit 2011-mi 33 procentimik qaffassimapput, taamaattumik SIK aamma GA isumaqarput aalisartut sakkortuallaamik qisuariaateqartut.