Aalisartut aasaq aalisarfissatsiarsuaq asiutittariaqalersinnaavaat
Benziina 200 liter, liiterimut 4 kroner 27 oorinik akilik, katillugit 900 koruunit, tassa Upernavik Seafood A/S-p tunitsivimminik matoqqatitsinerani Aappilattormiut Upernaviullu eqqaani umiatsiaararsortut akissaajaatissaat avannamut Tasiusap eqqaanut 100 kilometerit missaanni ungasissusilimmut tunisiartussagunik, taama allappoq Aappilattumi aalisartut ilaat Ferdinand Grim.
Allattoq Najaaraq Egede
juulip 09-at 2009 11:28
Umiarsuaq tunitsivik Rubin, Aappilattup eqqaanukassanersoq paasiniarsimagaluarnerarpaa, taamaalisoqarnissaali naatsorsuutigisinnaanagu oqaatigaa, taamaattumik aningaasarsiorniarnerat assut ilungersunartussaasoq oqaatigaa.
- Ilaquttat pilersukkat aamma akiligassat allat qanoq iliorumaarnerpavut. Tassami inunnik isumaginninnermut allaffimmut saaffiginnissaq piumanngikkaluaqaarput, Ferdinand Grim allappoq.
Aasarissuaq aalisarfigisseruttortoq oqaatigaa.
- Sussaqarata inuulernissaput akiligassanullu malinnaajunnaarnissarput, ila ajuusaarnaaqaaq, uagut pisuussutiginngisatsinnik taamaalisoqarnera, naggataatigut allappoq.