Aalisartut aalisarsinnaanerminnit mattunneqartut
Aalisartut pineqartut tamarmik Ilulissaninngaanneerput. Inuunermillu annersaanni aalisarnermik inuussutissarsiuteqarsimagaluarlutik:
- Tassa ukiorpassuit uanga ilinniagatuarigakku aalisarneq, taavalu angallateqartarnikuullunga siullermik. Umiatsiarlu una 2011-mili pigilerakku immikkut ittumik qinnuteqarneq atorlugu qinnuteqaqattaaraluarpunga itikkaaginnarlungali, Frederik Møller, aalisarnermut akuersissutaateqarsimagaluarluni allamik sivikitsumi inuussutissarsiuteqarnermi kingorna akuersissummik tunineqarumajunnaartoq taama oqarpoq, nangillunilu:
- Paasisinnaanngilara sooq taamannak pineqarlunga. Tassami ilinniagatuarigakku aalisarneq piniarnerlu. Paasisinnaanngilluinnarpara sooq akuersissummik tunineqarumannginnersunga, Frederik Møller oqarpoq.
Taannali kisimiinngilaq. Piitaaraq Janussenip inooqatini Nuummi 2010-miit 2012-mut ilinniartuusoq najoramiuk, avannaanut utereersimaleraluarluni akuersissummik tunineqarumajunnaarpoq:
- Massakkut pisinnaannginnera uannut sakkortuvoq, ilaquttannullu aappariinnitsinnullu sakkortuvoq isertitaqannginnerujussuara una pissutaalluni. Aappariinnitsinnut sakkortuvoq.
Aalisartut pineqartut pingajuata, Ove Rosbachip, nuliarigaluami 2009-mi perululluni napparsimanerani najoramiuk, aalisarnermut akuersissutaatini ukioq taanna atunngitsoorpaa. Maannalu aamma tunineqaqqikkumajunnaarpoq. Taassumalumi aalisartuuneq kinguaaminut ilitsersuutigalugu ingerlateqqikkusukkaluarpaa:
- Ernutaqarpunga nukappiararsuit inuusuttuaqqat. Taava massakkut suliffissat taama ajornartigitillugit tamanna aalisarneq kingornussinnaangaluarpaat.
Akuersissutinik tunniussisarneq kommuneqarfinnut tunniunneqartariaqartoq, Sinerissap Qanittuani Aalisartut Piniartullu Kattuffiannit isumarput. Kommuninimi sulisut innuttaasut qanimut ilisarisimaneruaat:
- Ilisimallugit allamik inuussutissarsiuteqanngitsut akuersissutinik agguaassisarneq kipiluttunartupilussuuvoq, Sinerissap Qanittuani Aalisartut Piniartullu Kattuffianni siulittaasoq, Anthon Lindenhann oqarpoq, nangillunilu:
- Isumaqarpunga kommuneqarfinnut akisussaaffinnik tunniussisoqartariaqartoq akuersissutit agguaanneqartarinut tunngatillugu.
KNAPK-mit ajornartorsiut aamma ilisisarisimalluarneqarpoq. Tamannarpiarlu pillugu Kattuffik Aalisarnermut Naalakkersuisoqarfimmut allagaqareersimagaluarpoq ulloq manna tikillugu akineqarsimanngitsunik.
Ajornartorsiutip Qanoruumi sammineqarnera Aalisarnermullu Naalakkersuisup pulaartorineqarnera aamma unnugu takusinnaavat.
