Aalisartunut taarsiisoqassanngilaq

Aalisartut Qaasuitsullu kommunea ukiup naalernerani kimigiisivissorarluarput qaleralittassat amerlineqarnissaat kissaatigalugu.

Ilaatigut tunngavilersuutigineqarpoq aalisartukkormiut akiligassanut malinnaasinnaajunnaartut qaleralittassat tamakkerneqarmata isertitassaarukkamik.

Tamakku tunulequtaralugit Siumut sinnerlugu Inatsisartuni ilaasortaq Hans Enoksen paragraf 36 naapertorlugu apeqquteqaraluarpoq Naalakkersuisut aalisartunut ukiup naanerani isertitaqanngitsunut taarsiissuteqassamaarnersut.

Naalakkersuisulli pissutsit allatut nalilerpaat. Tassamigooq pisassiissutit tamaasa katikkaanni Uummannaq eqqaani aalisartut siornaammut sanilliullugu 2010-mi 299 tons-inik pisaqarnerusimapput.

- Naatsorsuutigineqarsinnaangilaq pisassiissutinik sukkasuumik nungutsineq nammineq isertitanik annaasaqarnermik kinguneqartoq, aalisartunut imaluunniit tunisassiorfinnut aalisakkanik tunitsiviusunut. Uani pineqarpoq aalisartut pisiortortullu ataatsimut isigalugu ukiut siuliinut sanilliullugu isertitaat allanngunngitsut, akerlianilli ukiup siulianut sanilliullugu pisaaasa nalingi amerleriarput pisassiissutit amerlanerummata assigiinngissutaaginnarlunilu piffissap isertitsiviusup allanngornera, taama aalisarnermut Naalakkersuisoq Ane Hansen Hans Enoksenimut akissuteqarpoq.

- Aalisartut qaammatini pingasuni aalisarsimangitsut taamaammallu akiligassaminnik kinguaattoortut eqqarsaatigalugit erseqqissaatigerusuppara isertitaqannginnermut Naalakkersuisut taarsiisussaatitaanngitsut. Oqaatigineqareersutut isumaqarpunga aalisartut isertitaqareersut, taakkulu siusinnerusukkut isertinneqaannarsimasut, taama Ane Hansen oqarpoq.

Ilanngullugu erseqqissaatigaa aalisartut pisinnaatitaaffigigaat qimmit nerisassaannik aalisarnissaq pisassiissutinut ilanngaataanngitsumik.