Aalisartumut nuliaasoq katersuiniartitseqqusisoq

Margrethe Nielsen Uummannami aalisartumut nuliaasoq, KANUKOKA-mut allagaqarpoq, aalisartut piniartullu ikiorniarlugit nuna tamakkerlugu katersuiniartoqaqqullugu. Ikiuisoqarnissaanik kissaateqarpoq aalisartut piniartullu sapinngisani tamaat ikiorusukkamigit.

Margrethe Nielsen pingasunik meeraqarpoq, suliffeqarporlu SIK-p isumaqatigiissutai malillugit akissarsiaqarluni. Uimilu isertitaqannginnera ilaqutariit napatinniarnerannut malugilluarlugu. Jens Lars Fleischer-ip KANUKOKA-mi siulittaasuusup ilaqutariit aningaasakilliuleraangata kommunimut ikioqqullutik saaffiginnittarnissaanik innersuussuteqarpoq, oqaatigaluguli aalisartut piniartullu tunuarsimaartarnerat ilisimallugu.

Margrethe Nielsen-illumi saaffiginninnissani eqqarsaatigisaraluarpaa tunuarsimaartarlunili.

Margrethe Nielsen-ip ullut ilaanni meeqqani sussaqartinngitsoortarpai, naammagittarlunili inuuniarsaraluni.

- Ilumoortumik oqassaguma meeqqakka ullut ilaanni sussaqartinneq ajorpakka, ilaquttanut atornianngikkuma, Margrethe Nielsen oqarpoq.

Jens Lars Fleischer-ip avaqqunneqarsinnaannginnerarpaa siunissami naleqqusartoqarnissaanik kikkut tamarmik peqataallutik oqallittoqarnissaa.