Aalisartorsuaq Lazarus Olsen toquvoq

Aalisartorsuaq, Lazarus Olsen, Sisimiormiu, 86-inik ukioqarluni Sisimiuni apriilip ulluisa 28-anni toqusoq, Sisimiuni ippassaq maajip ulluisa aallaqqaataanni ilisaavoq.
Allattoq Louise M. Kleemann
maajip 02-at 2008 11:29

Lazarus Olsen imaatigut inuutissarsiornermini, ilaquttaminullu pilersuisuunermini, qaannamiit aallartilluni angallatini alliartortissimavai, kilisaatersorluni aalisarneq allaat angusimallugu, taamaaliornermigullu Sisimiuni nunatsinnilu aalisarnikkut ineriartortitsinermi siuttut maligassiuisullu nersortariaqarluinnartut ilagisimallugit.

Imaani inuutissarsiutini nuanarilluinnakkani nersornartumik 85-inik ukioqalernini tikillugu ingerlattuarsimavaa, ilaquttani pilersorlugit.

Lazarus Olsen Sisimiuni Aalisartut Piniartullu Peqatigiinni ataqqinaammik ilaasortaavoq.

Namminersornerullutik Oqartussat nersornaasiuttagaannik sølvimik saqqarmioqarpoq, aamma Danmarkip Naalagaaffiani Dronningip nersornaasiuttagaanik Den Kongelige Belønningsmedaljemik saqqarmioqarluni.

Sisimiuni Aalisartut Piniartullu Peqatigiit sinnerlugit taama eqqaaniaavoq siulittaasuugallartoq, Leif Fontaine.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq