Aalisartoq: Tunisineq unippat aalisartorpassuit eqqorneqassapput

- Pisassiissutigineqartut nungunneri tupaatigaara. Sumut saariarnissara nalornissutigaara, neriuutigaarali allamik aningaasarsiutissannik nassaarumaarlunga. Maani aalisartut amerlaqigatta tamatta aningaasarsiornissarput killilerneqarpoq.

Umiatsiaararsorluni aalisartoq, Niels Kristian Vetterlain taama oqarpoq.

Ukioq imaaliinnartoq qalerallit pisassiissutigineqartut nungunneri qaqutigoorpoq.

Qalerallit akii maanna qaffasittut aalisartuaqqanut isaatitsissutaajunnaarpata, aalisartut allanik isaatitsissutigisinnaasaminnik ujarlertariaqalissapput, soorlu qeeqqanik saarullinnillu. Saarulliilli akii maanna appasippallaartut aalisassallugit kajumernarneq ajortut, Niels Kristian Vetterlain-ip oqaatigaa.

- Maani qeeraqarpoq aammam saarulleqarpoq, taakku aalisakkat arlaat saaffigiumaarpara, kisianni saarulliit akii taama appasitsigisoq taakku aalisassallugit kajugernarneq ajorpoq, Niels Kristian Vetterlain oqarpoq.

Qeqertarsuup Tunuani umiatsiaararsorlutik aalisartut ukiuni kingullerni amerliartupilioormata qalerallit pisassiissutigineqartut ukioq imaaliinnartoq nungunneqarnerannut pissutaaqataasoq, Niels Kristian Vetterlain isumaqarpoq.

- Maani aalisartut taama amerliartortigitillugit, aalisarnermullu atortut pitsanngoriartuinnartillugit aalisartullu tamarluinnarmik qaleralinniartillugit pisassiissutit naammakkunnaarnikuuput.

Umiatsiaararsorluni aalisartoq, Iluliarmiu Niels Kristian Vetterlain taama oqarpoq.

Qaasuitsup Kommuneata borgmesteriata, Jess Svane-p nalunaarut aamma tusareersimalerpaa.

- Aalisartuaqqat pillugit qanoq iliuuseqarnissarput maanna misissuleruttorparput, Jess Svane oqarpoq, allamillu oqaaseqarsinnaagikkallarluni oqaatigalugu.