Aalisartoq aningaasarsitinneqanngitsoorsimasoq
Raajarniarnermi oqimaanaaraluni tunisinermi peqquserlunnerit imaaginnavissumik tusagassiutitigut tusarliunneqaqattaarput. Aalisartulli namminneq qanoq isumaqarpat?
Radioavisimiit Nuup umiarsualiviliarpugut.
Ullaap tungaa Nuummi nittaalaannguartoq umiarsualiviliarpugut Pinngortitaleriffiullu misissuutitut umiarsuaa Adolf Jensen naammattoorlutigu. Ikeriaratta siornatigut aalisartutut inuussutissarsiuteqarsimasoq Kristian Kristoffersen naammattoorparput.
”Unioqqutitsilluni aalisartoqarneranik nalunaarusiaq malinnaaffigillattaalaartarpara ilaannikkut. Inuttat akissarsiaqartitaaneri ingasagisarpakka….”
Apereqqipparput, tusagassiutitigut nalunaarusiarineqarsimasut malinnaaviginerini eqqortortaqarsorinerai.
”Immaqa ilaatigut taamaassinnaapput, immaqali annertunerpaamik eqqortortaqarneq ajorput…umiarsuaataatillit qanoq isumaqartarsimaneramik eqqortortaqarneq ajorput, aalisartuusimasoq Kristian Kristoffersen oqarpoq.
Taanna oqaluttuarpoq, siornatigut assagiarsunniummi inuttaatilluni qaammatit pingasut avataani sulisimalluni. Qaammatillu siulliit marluk ullormusiaqartinneqariarluni qaammatit pingajussaat aningaasarsitinneqarsimanani.
”Taamani assut pakatsinarpoq, ilami taamani qaavani sulerulussimaqalunga tikikkatta oorisiassaqartinneqannginnama”, Kristian Kristoffersen Adolf Jensenimi inuttaasoq taama oqaluttuarpoq.
