Aalisartoq: Akiligassanut angummanniarnarsiartorpoq

Aalisakkanik allanik aalisarnissamut periarfissat akilersinnaanngillat, tulaassivissat ungasissumiittarmata pisassiissutillu ingerlaannaq nunguttarlutik. Taamaattumik aalisartumut siunissaq taarpoq, aalisartoq Erik Egede oqarpoq.

- Akiligassat akilersinnaajumalugit ilungersortariqarpoq angallallu aserfallakkaluttuinnassammat aalisartumut Erik Egedemut siunissaq qaamaasuujunnaarpoq.

- Qaleralinnik aalisarsinnaanissaq aalisartumut napassutaasinnaanngilaq, Nuup kangerluani aalisarsinnaasut amerlammata, pisassiissutigineqartullu ingerlaannaq nunguttartussaammata, Erik Egede oqarpoq.

- Aalisartut assagiarsunnialissagaluarunik Nuummi tunitsivissaqanngillat, assagiarsunnut tunitsiviit Paamiuni Sisimiunilu immata. Aalisariutit kattullutik aalisarsinnaanerat periarfissaagaluarpoq, taamaattorli pisassiissutinut qinnuteqaatit naalakkersuisunut siullermik qinnutigineqassapput tamannalu pisariuvoq, Erik Egede aalisartoq Nuummioq oqarpoq.

Saarulliit Royal Greenlandimut tunineqartartut akii ippassaq appartinneqarput.