Aalisarnerup ineriartorluarnissaa aningaaseriviup pisortaata isumalluarfigaa

Aningasat aalisarnermi isertitarineqartartut suli amerlanerusinnaapput. BankNordikip Kalaallit Nunaanni immikkoortortaani pisortaa Jón Brekku taama isumaqarpoq.

- Aalisakkat Nunatta imartaani pisarineqartartut tamaani suliarineqaqqaarlutik avammut tunineqarsinnaanissaannut periarfissaqarluarpoq. Fabrikkit aalisakkanit isertitaat amerlippata, aningaasat Nunatta karsianut nakkartut aamma amerlissapput, tassami akileraarutitigut isertitat amerlissammata, Jón Brekku, aviisimut Jyllands-Postenimut taama oqarpoq.

Aalisakkat pisarineqartartut Nunatsinni annertunerusumik suliarineqartalertuuppata suliffiit amerlanerusut pilersinneqassasut, taassuma tikkuartorpaa. Inuilli fabrikkini sulilernissamut kajumissuseqarnerulersinniarlugit nutaamik aaqqissuusseqqittoqartariaqartoq aamma oqaatigaa:

- Sulisunik aalajaatsunik ilaatigut pissarsisinnaaneq ajornertik pissutigalugu suliffeqarfiit aalisakkanik suliarinnissinnaanissaminnut tunuarsimaartarput. Suliffissaaleqisummi aalisakkanik suliaqarnissartik kissaatigigunanngilaat, tamannalu ajuusaarnaqaaq, tassami aalisarneq Nunatsinni aningaasarsiornermi pingaarnerpaajuvoq, suliffissaaleqinerlu ajornartorsiutaalluni. Sulerusussuseqarneq suliffissaaleqisuunermit pingaartinneqarnerusariaqarpoq, taamaammat qinikkat kommunillu matumani unammilligassaqarput, Jón Brekku, Jyllands-Postenimut oqarpoq.

Aalisariutinut teknologiinullu nutaanut aningaasaliisoqarnissamut maanna pisariaqartitsisoqartoq, Brekkup oqaatigaa. Aningaasaliisoqassappalli Nunatsinni suliffeqarfiit angisuut aningaasaliisuusariaqassapput, suliffeqarfiit nunanit allaneersut aningaasaliisinnaanissaannut inatsisitigut killeqarmat.

- Aalisariutit nutarterneqarnissaat pingaaruteqarpoq. Tamanna maannamut salliutinneqarpallaarsimanngilaq, naak Namminersorlutik Oqartussat tapiissuteqarsinnaanissaat periarfissaagaluartoq. Aalisariuterpassuit pisoqalisimapput, aserfallassimaqalutillu. Aalisarnermi aningaasarsiorneq ilorraap tungaanut saatsinneqassappat aalisariutit ikinnerit annerillu pisariaqartinneqarput, Jón Brekku oqarpoq, Nunatsinnili aalisarnerup siuariartorumaarnera isumalluarfigalugu.