Aalisarnerup iluani mumisitsinissaq ungasilliallappoq

Aalisakkanik suliffissuaqarnerup iluani annertuumik allanngortiterisoqarnissaa sapaatit akunnerini kingullerni oqallisigineqarsimavoq. Aalisarnermulli naalakkersuisoq Karl Lyberth maanna tunuartilaarpasippoq.

Paragraffip aalisartutut inuussutissarsiuteqartuunissamik piumasaqaatitaqartup, aalisakkerivissuillu aalisakkanik raajanillu nammineq aalisarsinnaanissaannik inerteqquteqartussap, eqquteqqinneqarnissaanik aalajangiisoqarnissaa siusinnerpaamik upernaamut aatsaat pisinnaassasoq naalakkersuisup oqaatigaa.

Sulisitsisut Peqatigiiffianni, GA-mi, aalisakkerivissuarnik piginnittunik sullissisuusumi, taamatut oqaaseqartoqarnera nuannaarutigineqarpoq.

- Inatsisartuni taama aalajangersaasoqarnissaata utaqqissunnissaa isumatusaarneruvoq, aalajangiinissamummi tunngavissat tamakkiisumik qulaajarneqaqqaartariaqarput, pisortaq, Brian Buus taama oqarpoq.

Lyberthip inatsimmik allanngortitsiniarnera kinguartinneqartussatut isikkoqarsinnaavoq, taannami aalisartut akornanniinnaq iluarineqarmat.

GA-p aalisarnermik inuussutissarsiornerup tamarmiusup siunissaa aarlerinartoqartippaa, SIK-llu taamatut iliortoqarneratigut suliffinnik annaasaqartoqarnissaa ernumassutigalugu.

- Tunisassiortut nammineerlutik aalisarsinnaanngikkunik suliffissuaataat imminut akilersinnaannginnerinik oqarneq eqqortuusorinngilara, Karl Lyberth oqarpoq.

Apeqqullu taava kiserngoruttoq tassaalerpoq, Karl Lyberthip aalisakkanik tunisassiortorsuarni suliffinnik annaasaqartoqarnissaa ernumassutigineraa?

- Naagga, taamatut isumaqarnikuunngisaannarpunga. Aalisakkammi tassaniipput, tassaniittuaannarsimallutillu. Aalisakkat pisarineqarsinnaasut amerlassusaat nikinngippata - immaqalu qanittukkut amerlanerusunngorpata - taava suliffissuarni suliffiit ikinnerulernerinik kinguneqarnavianngilaq, naalakkersuisoq oqarpoq.

Karl Lyberth aperineqarami aningaasaqarnermut naalakkersuisorlu Vittus Qujaukitsoq, Royal Greenlandip sinneqartooruteqalaarnissaanik siumoorluni naatsorsuereersimanersut, qisuariarnera eqqissisimavoq.

- Hahaha, naagga suli tassunga killeqqanngilagut, politikkikkulli anguniagaqarpugut, taakkulumi kingunissaat soorunami piareersimaffigissavagut, oqarpoq.

Karl Lyberthip illalaarnerata aalisarnermut tunngatillugu aalajangiinerit pingaarutillit Inatsisartuni upernaakkut ataatsimiinneranni aatsaat pinissaannik uppernarsaagaluartoq, Karl Lyberth pingaarnersiuinissaminut piareersimanerarpoq.

Aalisartuaqqat isaassiffigineqarnissaannut piffissanngorpoq. Aalisartuaqqammi misigisimapput Royal Greenlandip Polar Seafoodillu nammineq qanorsuaq aalisarsinnaanermikkut tunisinermi akinut pissaaneqarpallaartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat