Aalisarnermut Siunnersuisoqatigiit: Siunnersuut marloqiusanngorlugu saqqummiunneqartariaqarpoq

Aalisarnermut inatsisissap nutaap iluamik tusarniaassutigineqaqqaarani naalakkersuisunit maanna siunnersuutigineqartoq, Aalisarnermut Siunnersuisoqatigiit ippassaq oqaatigaat, tuaviuussaavallaartorlu oqaatigalugu. Inatsisissatut siunnersuut maanna tusarniaassutigineqartoq danskisuinnaq allanneqarallarsimavoq, aalisartullu amerlanersaasa kalaallisuinnaq atuarsinnaallutillu paasinnissinnaammata kalaallisuunngorlugu saqqummiunneqarnissaa Siunnersuisoqatigiit utaqqimaaqqugaluarpaat.

Siunnersuullu marloqiusanngorlugu saqqummiunneqarnissaa piumasarivaat. Siunnersuisoqatigiinni siulittaasoq John Biilmann ima oqarpoq:

- Inatsit maanna atuuttoq atuaruminarsarlugu ullutsinnullu naleqquttunngorlugu allaqqissaarneqartariaqarpoq, atuisut tamarmik oqitsumik atuarsinnaaniassammassuk paasillugulu, John Biilmann oqarpoq, nangillunilu:

- Politikkimut tunnganerusut, aningaasarsiornermullu tunnganerusut tulliattut sammineqassapput. Nalilersoqqissaagassat inatsisartuni kingusinnerusukkut sammineqarsinnaassammata, John Biilmann oqarpoq.

Aalisarnermut piniarnermullu naalakkersuisoq Finn Karlsen oqaaseqartinniaraluaratsigu iluatsitsinngilagut.