Aalisarnermut Siunnersuisoqatigiit: Aalisarnermut inatsisissaq tuaviussaavallaarpoq

Aalisarnermut inatsisissaq nutaaq aalisarnermik inuussutissarsiutillit aallartitaannik naalakkersuisunit isumaqatigiinniutigineqarumanngilaq.

Inatsisartut inassuteqaataannut tamanna akerliuvoq. Aalisarnermut Siunnersuisoqatgiit tusagassiuutinut allagaqaatiminni taama allapput.

Tamanna pissutigalugu Aalisarnermut Siunnersuisoqatigiit naalakkersuisunut mianersoqqusipput, oqarlutik inatsit tuaviuussaavallaartoq.

Aalajangiinerit uppernarsarluakkanik tunngavillit tamatumunnga taarsiutaassaasut Siunnersuisoqatigiit piumasaraat, qulaajagassalli amerlaqimmata piffissangaatsiarujussuaq aatsaat atoqqaarlugu tamanna pisinnaavoq, Siunnersuisoqatigiit allapput, naalakkersuisulli taamaaliorumanngillat, Siunnersuisoqatigiillu inassuteqaataat ilaatinnagit aalisarnermut inatsisissatut siunnersuusiortoqarluni.

Siunnersuut maajip 17-iani tusarniutissatut nassiunneqarpoq, akissuteqarfiginissaalu qaammammik ataatsimik piffissalerneqarluni. Siunnersuut danskisuinnaq allassimammat tusarniutigineqarnissaanut ulloq killissarititaq juulip 20-iannut kinguartinneqarpoq.

Naalakkersuisut Aqutsinermut Aningaasarsiornermut Nalunaarutaat 2007, inatsisartut ukioq manna upernaakkut ataatsimiinneranni partiinit tamanit akuersissutigineqarpoq, aalisarnermillu inuussutissarsiortut oqaloqatigineqassasut siunniunneqarluni.

- Tamannali naalakkersuisoqatigiinni aaqqissuussimaneqarpasinngilaq, Aalisarnermut Siunnersuisoqatigiit allapput.