Aalisarnermut siunnersuisoqatigiit: Aalisarnermut inatsisissaq siunertarisaminut naapertuutinngilaq

Aalisarnermut inatsisissamut nutaamut tunngatillugu siunnersuutiminni naalakkersuisut imminnut assortortut, Jens K. Lyberth, aalisarnermut siunnersuisoqatigiinni siulittaasumut tullersortaasup oqaatigaa,

Aalisarnermut inatsisissaq nutaaq tuaviuussaanerarlugu Jens K. Lyberth oqareerluni ima nangippoq:

- Piginneqataassutit tuniniarneqarnerini periarfissat iluamik tusaaniarneqarsimanngitsutut isikkoqarput, tassanilu ileqqaarutit pisariaqartitat eqqarsaatigineqartariaqarput. Tassa aningaaserivinninngaanniit allaninngaanniilluunniit aningaasanik taarsigassarsiniarnermut periarfissat killeqalersinnaanerat annilaanngatigaarput, taassumalu saniatigut piginneqataasinnaasut aamma ikilisinniarneqarlutik. Ineriartortitsinissamut periarfissat taamaasillutik ajornerulissapput, Jens K. Lyberth oqarpoq, nangipporlu:

- Aalisarnerup siunissami qanoq isikkoqalernissaa pillugu naalakkersuisut 2004-mi inatsisartunut nalunaarusiornikuupput, nalunaarusiarlu atuaraanni takuneqarsinnaavoq sinerissap qanittuani aalisarnermi pissutsit allanngortiterneqartariaqartutut nalilerneqartut, tassungalu atatillugu aningaasat pisariaqartitat amerlasoorujussuusussaammata aningaasaliisinnaasut ikilineqarnerat piginneqataasinnaasullu ikilisinneqarsinnaanissaannut siunnersuut siunertarisamut akerliusutut isikkoqalersinnaavoq, Aalisarnermut siunnersuisoqatigiinni siulittaasup tullia Jens K. Lyberth oqarpoq.

Aalisarnermut naalakkersuisup Finn Karlsenip aalajangiusimavaa tusarniaanermut atatillugu qisuariaatit tamarmik suliamut kakkissorneqarmata.