Aalisarnermut piniarnermullu ilinniarfik Uummannamiitsinniarpaat

Ilinniarfiup Maniitsumi Sisimiuniluunniit inissinneqarsinnaanissaa suleqatigiissitaliap innersuussutigigaluarpaa.
Allattoq Mads Lynge
novembarip 11-at 2007 17:03

Aalisarnermut piniarnermullu ilinniarfiup Uummannami inissinneqarnissaa Naalakkersuisut innersuussutigaat. Suleqatigiissitaliap innersuussutaa taamaaliornikkut eqquutsinneqanngilaq, Aalisarnermut piniarnermullu ilinniarfiup Maniitsumi inissinneqarnissaa taakku innersuussutigigamikku.

Sermitsiap nittartagaani tamanna atuarneqarsinnaavoq.

Aalisarnermut piniarnermullu ilinniarfiup Uummannami inissinneqarsinnaanissaa pillugu Inuit Ataqatigiit sinnerlugit Inatsisartuni ilaasortap Ane Hansenip naalakkersuisunut apeqquteqaatigaa.

Tamanna pillugu suliniutit aallartinneqarsimanngitsut Inuussutissarsiornermut naalakkersuisoq Siverth K. Heilmann akissuteqaatimini allappoq, ilinniarfilli Uummannami inissinneqarnissaa Naalakkersuisut oktobarip 22-iani ataatsimiinnerminni isumaqatigiissutigisimagaat oqaatigalugu.

ATI Maniitsumiittoq kiisalu Imarsiornermik Ilinniarfik Paamiuniittoq suleqatigalugu ilinniartitsisoqarsinnaanissaa Naalakkersuisut oqariartuutigaat.

Aalisarnermut piniarnermullu ilinniarfissaq pillugu suleqatigiissitaliap innersuussutaa naapertorlugu Aalisarnermut Piniarnermullu Ilinniarfiup Maniitsumi Sisimiuniluunniit inissinneqarsinnaanissaa innersuussutigigaluarpaa.