Piniarnermut nakkutilliisut nunatsinni amerlanerulersinniarlugit, nakkutilliisunik ilinniartitsisalernissamik Paamiut kommuniat piniarnermullu nakkutilliisut qullersaqarfiat peqatigiillutik misileraalerput.
Paamiut Kommuneani inuussutissarsiornermut siunnersorti Niels Løvstrøm Petersen ima oqarpoq:
- Isumaqatigiissut assigiinngitsunik pisussaaffiliivoq. Paamiut Kommuneani angallataqarnermut akissarsiaqartitsinissamillu isumaqatigiissuteqarfigivagut, pikkorissartitsinerit ilinniartitsinerillu Namminersornerullutik Oqartussanit pilersaarusiorneqassapput ingerlatsivissarlu isumagisussaallugu. Isumaqatigiissut juulip aallaqqaataaniit atuutilerpoq, Niels Løvstrøm Petersen oqarpoq.
Nakkutilliisussanik ilinniartitsisalernissaq pisariaqartoq Aalisarnermut akuersissutinik nakkutilliiveqarfimmeersoq Klaus Frederiksen oqarpoq, illoqarfiillu allat aamma soqutigilissagaat neriuutigigitsik oqarpoq:
- Manna misilittagaqarfigillualerutsigu pitsaaqutit pitsaavallaanngitsullu suunersut oqaatigisinnaassallugit neriuutigaarput, Klaus Frederiksen oqarpoq, nangillunilu:
- Avataaniit sunnerneqariartornerup kingunerisaanik pisariaqartinneqalersimavoq nakkutilliisoqarnissaq, soorlu nunani allani taama pisoqartartoq, Klaus Frederiksen nassuiaavoq.
KNAPK-p pisortaata John Biilmannip Paamiuni iliuusaalersoq tapersersorluarpaa, isumaqarluni piujuaannartitsinermik sulineq ingerlaannassammat.
