Aalisarnermut naalakkersuisumut tatiginnikkunnaarnermik taasisitsisoqarpoq

Aalisarnermut piniarnermullu naalakkersuisoq Finn Karlsen pillugu tatiginnikkunnaarnermik Inatsisartuni ullumi taasisitsisoqarmat, ataatsimik amerlanerussuteqartoqarneratigut Finn Karlsen aniguivoq.

Aalisarnermut inatsisissaq ullaap tungaa oqallisigineqarmat Kattusseqatigiit Partiiata ilaasortaatitaa Anthon Frederiksen taasisitsisoqarnissaanik siunnersuuteqarpoq.

Aalisarnermut kommissionimik pilersitsisoqarnissaanik inatsisartunit piumasaqaatigineqartoq, aalisarnermut piniarnermullu naalakkersuisumit malinneqarsimannginnerarlugu, Anthon Frederiksen taama siunnersuuteqarpoq.

- Inatsisartut piumasaqarpata naalakkersuisut pisussaaffigivaat piumasaqaatit malissallugit, kisianni malinneqarsimanngitsoq paasigatsigut tatiginninnginnermik taasisitsivugut, Anthon Frederiksen oqarpoq.

Ullumi ulloqeqqanngitsiartoq inatsisartuni taasisitsisoqarmat aalisarnermut piniarnermullu naalakkersuisoq naalakkersuisoqatigiinnit Siumumit Atassummillu tapersersorneqarpoq, Demokraatit, Inuit Ataqatigiit Kattusseqatigiillu Partiiat tapersersuinatik taasipput.

Taamaalilluni Finn Karlsen naalakkersuisuni ilaasortatut ingerlaannassaaq.