Aalisarnermut Naalakkersuisoq Royal Greenlandimut pulaarpoq
Nunatsinni aalisakkanik tunisassiorfiit annersaanni neriuutigineqarpoq, pulaartoqarneq siunissami suleqatigiilluarnissamut tunngaviliiumaartoq, suliffeqarfissuup pisortaa Jens K. Lyberth pulaartoqareernermik kingorna oqarpoq.
Karl Kristian Kruse ilaatigut suliffeqarfissuup 2013-imi 2014-imilu aningaasaqarneranik nassuiaanneqarpoq, aammalu Royal Greenlandip kattuffinnik SIK-mik KNAPK-millu suleqateqarnera pillugu oqaluttuunneqarpoq, kiisalu Royal Greenlandip ukiut ingerlanerini oqaluttuassartaa pillugu nassuiaanneqarsimalluni.
Royal Greenlandimut pingaaruteqarpoq aalisarnerup, tunisassiornerup nunanullu allanut tuniniaanerup ataqatigiinnerat erseqqissassallugu.
- Isumaqarpunga assorsuaq pingaaruteqartoq taakku pingasut ataqatigiinnerat erseqqissassallugu. Aalisarneq eqqartoraangatsigu, pinngitsoorneqarsinnaanngilaq aalisakkap pisarineqarnerata, suliffissuarmilu suliareqqinneqarnerata tuniniarneqarneratalu ataqatigiinnerat, Jens K. Lyberth nassuiaavoq.
