Aalisarnermut Naalakkersuisoq isorineqangaatsiarpoq
Inatsisartut tallimanngornermi oqallinneranni Naalakkersuisut aalisarnermut siunissami politikkissaat amerlanertigut illuatungliuttuninngaanniit isorinnissutinik ulikkaarpoq. Nalunaaquttap akunneri sisamat sinnerlugit Naalakkersuisut Royal Greenlandimut-mut attuumassuteqartut tatigineqannginnermik tusartinneqartuarlutik.
Illuatungliuttunit, Atassummit Demokraatinit Kattusseqatigiinnillu isorinnissutit oqallinnerup ingerlanerani sakkortusiartuaarput. Illuatungiliuttut kisimik isorinniinnanngillaat aammali naalakkersuisooqataasunit Inuit Ataqatigiinnit Aalisarnermut Naalakkersuisup Simon Olsen-ip nassuiaataa isorineqaqattaarpoq.
Aalisarneq pillugu nassuiaatip kisitsinik tunngavilersugaarpalunnginnera, Kukkunersuisullu isumaliutissiissutaatigut Aalisarnermut Naalakkersuisup aqutsinerliugaanera, ESU-lu aqqutigalugu tapiissutit aningaasartaasa agguaanneqartarneri isornartorsiuinermi tikeqqajaaneqarput. Allaat aningaasartaasa agguaanneqartarneri inatsinik unioqqutitsinermik imaqartinneqarlutik.
Aamma Naalakkersuisuni ilaasortap Jørgen Wæver Johansen-ip Royal Greenlandimut akisussaanera tunngavigalugu suliffeqarfimmi pisut oqallisaaqisut isornartorsiorneqangaatsiarput.
Inatsisartuni ullumi oqallinneq tunngavigalugu illuatungiliuttut tamaviaaqqinnissaat ilimagineqarpoq. Ilimagineqarporlu Aalisarnermut Naalakkersuisoq Simon Olsen tatiginninnginnermik suaarfigineqarumaartoq. Isorinninneq Siumut Inuit Ataqatigiillu Naalakkersuisooqatigiinnerannut annertunerusumik kinguneqassangatinngikkini Naalakkersuisut siulittaasuat Hans Enoksen oqarpoq.
