Aalisarnermut ministerit: Aalisakkat avannarpartertut aalisapilunneqassanngillat
- Isumaqatigiittupilussuuvugut inerniliinermi silaannaap allanngornerata nassatarisaanik naleqqussarnissarput. Pisuussutit siornatigut maani Atlantikup avannaani annikitsumik aalisarneqartut, ilaatigut aalisarneqanngikkaluartut massakkut amerlasoorpassuanngorlutik takkuttalersimanerat, mianersuullugu piujuaannartitsineq tunngavigalugu aalisarnissarput. Aammalu tamakkununnga naleqqussartariaqarnerput tamakkununnga pisassat peqqissaartumik aqunneqarnissaat aamma isumaqatigiissutigisorujussuuarput, Aalisarnermut Naalakkersuisoq, Finn Karlsen, oqarpoq.
Taamaalilluni Atlantikup imartaani pisassiinissamut siunnersuutit najoqqutaralugit pisassiisarnissaq siunniunneqarpoq:
- Tassa aalisapilunneqannginnissaat isumaqatigiissutigaarput. Tassa siornatigut ukiorpaalussuit matuma siorna aalisapilunnerit ingerlasupilussuusarput. Aamma nunat makkua suleqatigut taamaannikuupput avataani aalisartarnerit eqqarsaatigalugit siunnersuinerit soqutigivallaarnagit imminnut pisassittarnikuupput. Kisianni tassa massakkut tamanna qaangeriartorneqarpoq. Aammalu sapinngisamik inassuteqaatit tunngavigalugit pisassinneqartarnissaq anguneqassasoq pinngitsoornani taanna anguneqassasoq isumaqatigiissutigaarput, Finn Karlsen oqarpoq.
Silap kissatsikkiartornerata kingunerisa ilaannik Nunatta avaleraasartuunik misileraalluni aalisarnera, aalisarnermut ministerit naapinneranni annertunerusumik uparuarneqarsimanngitsoq ilanngullugu Finn Karlsen oqarpoq:
- Isornartorsiorneqanngilagut. Tassa taamatut immitsinnut pisasseqqaaratta 100.000-inik tonsinik makrelinik sakkortoorujussuarmik isornartorsiuisoqarpoq. Allaat EU-mit. Kisianni qamani ataatsimiikkatta aamma EU peqataavoq. Tassani aporfilersorneqanngivippugut taamatut pisassinnitsinnut. Tassa sapinngisamik amerlanerpaanik pisaqarsinnaanerput ajorineqanngippoq. Kisianni nunatut sinerialittut ilanngutissagutta immitsinnut pisassittalerluta, taava tassa siunnersuinerit tunngavigalugit pisassiisalissuugut, Finn Karlsen taama oqarpoq, nangillunilu:
- Aamma taassuma saniatigut eqqaavarput Nordpol-ip eqqaani kikkut tamarmik aalisarfigisinnaasaat eqqarsaatigalugu mianereqqinnaarlugu aalisartoqarnissaa. Killeqanngitsorsuarmik aalisartoqannginnissaa taanna isumaqatigiissutigaarput. Nunallu allat maani peqataanngitsut aamma sunnerniassagigut. Aqunneqartumik pinngitsoorani aalisartoqarnissaa siunniutissagipput, Finn Karlsen oqarpoq.
